नेपाली हास्यव्यङ्ग्य अनलाइन पत्रिका

चन्द्रमणि अधिकारी :

अचम (अभिनव व्यास)

१.
कोदालो घन बञ्चरो र हँसिया डोको र नाम्लो सब
भ्रष्टाचार निवारणार्थ उभिए बाँधिन्छ दाम्लो अब
नेपाली मन स्वच्छ मान मनितो विस्तार गर्ने क्रम
गर्जन्छन् पहरा र साथ लहरा मेट्ने बनेका भ्रम ।

२.
माटोका कणमा उठ्यो सनसनी उड्दै गरे वालुवा
हल्लन्छन् अब यी समस्त विरुवा सङ्केतमा पालुवा
निस्केका पहिरो लिएर गहिरो अत्यास पार्दा जब
मासे ध्वस्त बनाउँदै जब गए याे राष्ट्रको गौरव ।

३.
निस्केका युवती युवा सडकमा यी भ्रष्ट मास्ने भनी
यस्तो वैभव पूर्ण राष्ट्र गरिमा छिट्टै उकास्ने बनी
फर्कन्छन् परदेशबाट घरमा होस् राष्ट्रको उन्नति
भन्ने भाव उकासिएर जनको होस् भ्रष्ट मास्ने मति ।

४.
नेपाली इतिहासको उदयको आयाम नौलो खुली
जुट्छन् उद्यम गर्न निम्ति जनता बढ्दा नयाँ खुल्दुली
यो नेपाल सदैव विश्व भरको सर्वोच्च माथासित
चम्केला जन हौसला अति बढी आदर्श उत्कर्षित ।

५.
भागाभाग हुने छ भ्रष्ट सबको लुक्छन् दुलामा पसी
ताजा तार्किक धारणा सरलले छन् दुष्ट पार्ने खसी
फोर्नेछन् शिर यी प्रहार बलियो पार्दै सबै भ्रष्टकोे
झण्डा फर्फर शैलको शिखरमा गर्नेछ उत्कृष्ट याे ।

०००
मणिकुञ्ज, म्याग्दे ४, तनहुँ ।