नेपाली हास्यव्यङ्ग्य अनलाइन पत्रिका

अविचल आस्था मणि :

सगर्व निस्क हे युवा ! उमार्न वृक्ष पालुवा
छ भ्रष्ट चाल चालिँदै रचेर भोरको जुवा
विदेशमा थुपारियो लुटेर राष्ट्र सम्पदा
स्वदेशमा उमारियो अनर्थ लाख आपदा ।

विवेक ज्ञान भष्म झैँ भए छ खिन्न काइदा
लुटे भुटे विवादमा मुछेर चुट्न फाइदा
अभाव राष्ट्रमा भयो प्रभाव राष्ट्र भक्तिको
उठौं लडौं जुटौँ युवा छिटो सचेत शक्तिको ।

मिलेर मार्ग रोजियोस् उँभो उँधो जता बनोस्
समग्र लोक दृष्टिले उठे युवा सबै भनोस्
सपार्न खार्न योजना बनाइयोस् सरासर
सचेत होस् समर्थ होस् मिलापमा बराबर ।

सुधार गर्न धर्मको सनातनी जराजरा
प्रसङ्गमा उमङ्गको उमारियोस्न आँकुरा
तयार बन्नुहोस् युवा समाजमा परस्पर
विकास हुन्छ देशको मिलेर गर्न तर्खर ।

परम्परा बसालियोस् उमङ्ग भर्न काममा
र राष्ट्र गान गाइयोस् बसेर साथ लाममा
भविष्यको सुधारको प्रयास सत्य केन्द्रित
बनाइने गरोस् सधैँ उपायसाथ निश्चित ।

प्रकाश यानमा चढी विभिन्न सौर्यमण्डल
उडान हौसिने भयो विशिष्ट काव्यमण्डल
प्रयासमा निवासमा म प्रातमा र साँझमा
रमाउँदै रची बसें म काव्य अन्तरालमा ।

म हौसिएर रौसिँदा गरिन्छ शीघ्र फैसला
विवेक शब्द सारमा समेटिने भए भला
अमानवीयता हट्यो सबै बनेर जर्जर
छु आउँदै रमाउँदै म काव्य लेख्न भर्खर ।

प्रकाश पूर्ण बिम्ब जो चढाइँदैछ भिन्नता
प्रयास चूर्ण पारिने बढाइँदैछ खिन्नता
युवा खुला स्वभावमा उठेर उच्च पंक्तिमा
तुरून्त निस्क योजना झिकेर देश भक्तिमा ।

युवा सचेत प्रार्थना छ राष्ट्रको उठोस् शिर
समस्त भ्रष्ट मासिऊन् खुलोस् भनेर तक्दिर
प्रसिद्ध सिद्ध बालिका भनौँ कि वा किशोर हौ
दिएर सान्त्वना बढी सधैँ रह्यौ विभोर छौ ।

मनग्य ज्ञान ध्यानमा र योगको प्रयोगमा
सुशान्त छौ रमाउँदै मिलाप वा वियोगमा
नजानिने र जानिने, नमानिने र मानिने
प्रयास स्वच्छ छुट्टिने भएछ ज्ञान खुट्टिने ।

कमाल ख्याल जे भयो विवाद सभ्य चालमा
सबै विवाद मेटियो निशर्त अन्तरालमा
छ मास्न भ्रष्टता जरा, सदैव ध्यान राखियो
उमेदवार होस् युवा सतर्क जोश डाकियो ।

सुताउने उठाउने विभिन्न चाल चालियो
समस्त मैल देशको विवेकले पखालियो
रहेन खिन्नता कसै समस्त प्वाल टालियो
प्रशस्त पुण्य तीर्थमा नुहाइयो बटालियो ।

समस्त भ्रष्ट पारिए निसासिने थला जहाँ
खुलाइएर ल्याइए उकासिने कला त्यहाँ
लिने दिने बराबरी भएर प्रेम काइदा
बुझाइयो मजा छ यो तटस्थ बस्न फाइदा ।

पराग प्रेम पुष्पको मिलेर ढुक्क यो मन
भनेर भन्दछ्यौ मुना म साट्छु स्वस्थ यौवन
म बन्छु नव्य नायिका छु साथमा खुली बन्यौ
छ मेट्न भ्रष्टता सधैँ र तस्करी सबै भन्यौ ।

नजा कतै कसै भन्यौ बनेछ कार्यतालिका
हुनेछु जो सधैँ भन्यौ कृतार्थ सभ्य बालिका
कुरा पुराणका तथा कुरानका सुनाइयो
लिएर अङ्कमालमा विनोद चुन्न लाइयो ।

सवालको कमालले बनेछ छन्द घाइते
कुरा उठाउँदै थियाे बुझिन्छ हाल काइते
लिएर शास्त्र शस्त्रको विनोद व्यङ्ग्य वाणको
हवास होश उम्कियो परेछ तोड प्राणको ।

०००
तनहुँ, नेपाल ।