नेपाली हास्यव्यङ्ग्य अनलाइन पत्रिका

चन्द्रमणि अधिकारी :

१.
छु सम्झेको आमा ! शुभ प्रहरमा शुभ्र ममता
छु चाही आएको सहज अहिले बुद्ध क्षमता
छु फाल्ने इच्छामा सहज नहुने जो विषमता
छु पाल्ने आशामा सकुशल कला साथ समता ।

२.
तिमी भन्दा ज्ञानी भनन छ र को यो भुवनमा ?
सबैकी आमा झैँ सकरुण सदा भित्र मनमा
सदाचारी शिक्षा तन मन खुला याेग सहित
बनेकी ज्योत्स्ना छौ प्रखर प्रतिभा झन् मुकुलित ।

३.
फलाहारी खाना विधिवत जुटाई पवनमा
झुकेकी देखिन्छ्यौ नरम अति नै जो नयनमा
सबै आफ्नो मानी हृदयत छ श्रद्धा वितरण
नसोधी भन्दैछौ वरपर भएकाे विवरण ।

४.
जगन्माता दुर्गा अवतरित गार्गी प्रकरण
गरेकी स्वेच्छाले अथकित अहा ! यो विचरण
सिकाएकी बाटो सुगमसित चल्ने कदम छौ
भनी काखा च्याप्ने सहजसित आफैं अचम हौ ।

५.
उखेली फाल्दैछौ छलकपटका मूल सहित
उकालोमा लान्छ्यौ सकुशल अहा ! कोमल रित
डराएका हुन्छन् अधम शठ काँप्छन् थुरथुर
मिलाएकी हुन्छ्यौ वचन सुविधामा लयसुर ।

०००
२०८१/०३/३१, बिहान
तनहुँ, नेपाल ।