नेपाली हास्यव्यङ्ग्य अनलाइन पत्रिका

कविराज घिमिरे :

गर्छन् सिको जे देख्तछन् आमाबुबाका कर्म ती
सन्तान ता मर्मज्ञ हुन् आचार जान्ने बुद्ध यी
सामान्य हुन् यी भन्दछौँ सिक्छन् तुरुन्तै जङ्गिँदा
छौँ आज पश्चातापमा सन्तान आफ्ना बिग्रिँदा ।। १

लाएर बाली हुर्किँदा अभ्यास हुन्छन् लाखमा
दौडेर खै ! आयो यहाँ खाद्यान्न आफ्नो काखमा ?
आवास हाम्रो त्यत्तिकै गर्ल्याम्म गर्दै भत्किँदा
बित्यास ! को होला खुसी सन्तान आफ्ना बिग्रिँदा ।। २

बानी बिगार्ने बाबुले गर्दै नसाको सेवन
आमा चहार्छिन् गाउँमा गर्दै कुराको सेचन
सन्तानले सिक्ला र के शिक्षा मिल्यो यो सर्वदा
के दुःख मान्छौ व्यर्थमा सन्तान आफ्ना बिग्रिँदा ।। ३

अश्लील भित्री कर्म छन् छोपेर के छोपिन्छ र ?
छन् मित्र द्रोही साथमा सत्कर्म के देखिन्छ र ?
छैनन् सफा ती योजना मिल्दैन केही उफ्रिँदा
चेत्ने छ पक्का जो गिऱ्यो सन्तान आफ्ना बिग्रिँदा ।। ४

हामी भलो बन्छौँ भने बन्ला जगत् वैशिष्ट्य यो
राख्ने गरौँ सद्भावना सत्कर्मको उद्देश्य यो
सन्तानमा ऊर्जा हुने मातापिता यी सप्रिँदा
डुङ्गा यहाँ डुब्ने त हो सन्तान आफ्ना बिग्रिँदा ।। ५

०००
भक्तपुर