नेपाली हास्यव्यङ्ग्य अनलाइन पत्रिका

नन्दलाल आचार्य :

आकाशैमा बादलु छ, वनमा चरचरी
हाम्रो देशको हालखबर, भन्छु है सरासरी ।
​
चुनाव आयो गाउँबेसी, नेताको लर्को छ
हिजो गाली गर्नेको नि, आज त झर्को छ ।
हात जोडी ढोग्छन् हजुर, भोटको आशामा
सपनाको महल बुन्छन्, चिल्लो यो भाषामा ।। १ ।।

​खल्तीभरी मोबाइल छ, फेसबुकको दुनियाँ
चियापसल गफ मात्रै, कोही छैन मुनियाँ ।
खाना खानु अगाडि नै, फोटो खिच्नुपर्ने
भित्रभित्रै मन रोए नि, हाँसो झिक्नुपर्ने ।। २ ।।

​महँगीले ढाड सेक्यो, बजार जाँदा खेरि
रित्तो हात फर्किनु पर्छ, मूल्य हेर्दा फेरि ।
प्याजको भाव सोध्दा खेरि, आँखाबाट आँसु
कहाँ जानु खानलाई, बोकाको त्यो मासु ।। ३ ।।

​पढेलेखेका युवा जति, पुगेका छन् खाडी
देशभित्र फाइल मात्रै, सर्छ अघिपछाडि ।
डिग्री हातमा पासपोर्ट साथमा, उडानकै चिन्ता
रित्तो भयो गाउँघर, उड्यो सबै निद्रा ।। ४ ।।

​पानी आउँछ पाइपमा, धूलो र धूँवा मात्र
मेलम्चीको कथा सुन्दा, रोइदिन्छन् पात्र ।
बाटो खन्छन् आज एउटा, भोलि फेरि पुर्छन्
विकासको बजेट जति, झोलामा नै फुर्छन् ।। ५ ।।

​स्वास्नी घरमा बाघ जस्ती, श्रीमान् बिरालो
सहरिया जीवन यो, कस्तो छ निरालो ।
ऋण काटी घिउ खाने, आडम्बरको खेती
सुध्रिने हो कहिले खै, हाम्रो यो बेथिति ।। ६ ।।

मरि लानु के छ र नि, हाँसेर बाँचौँला
बेथितिको व्यङ्ग्य गरी, कम्मर नाचौँला !

(क्रमशः अर्को भागमा……)

०००
बेलका- २, सिद्धार्थटोल, गल्फडिया, उदयपुर नेपाल ।