नेपाली हास्यव्यङ्ग्य अनलाइन पत्रिका

पदम दाहाल :

भयो यात्रा लामो किन्तु खै त्यो जवानी
अझै बाँकी उस्तै कर्म कर्मिष्ठ नामी ।
भएनन् आफन्ती व्यग्र वृद्धा भला झन्
मिलेका साथी झैँ वृद्धवृद्धा सँगै छन् । ।१।

बुझे वा बुझ्दैनन् याद सद्भाव छैनन्
पिरोलो ठाने वा वृद्ध सत्कार छैनन् ।
विदेशी भो आफ्नो सज्जनै साथ को छन् ?
मिलेका साथी झैँ वृद्धवृद्धा सँगै छन् । ।२।

चखेवाको जोडी हो कि उस्तै छ बानी
नबिर्सौँ झैँ लाग्ने राम–सीता कहानी ।
परेवाको जोडी शान्तिका दूत भन्छन्
दुरुस्तै हो मिल्ती वृद्धवृद्धा सँगै छन् । ।३।

बजै–बाजे मैत्री प्रेम सद्भाव कस्तो
फलैँचा चौतारी मेल विश्राम जस्तो ।
भरोसा आफैँमा जिन्दगी कामयाबी
मिलेका छन् ज्यादै वृद्ध जोडा नबाझी । ।४।

निरोगी भै दोटै जीव दीर्घायु होऊन्
शिखण्डी बिर्साई नित्य संस्कार छाऊन् !
छ भाग्गेमा जे जे दैवले दिन्छ भन्छन्
मिलेका साथी झैँ वृद्धवृद्धा सँगै छन् । ।५।

०००