सञ्जय साह मित्रसम्मानोपहार
मेरो मूड अफ । एक छिनमा म फ्रेस हुन्छु । दिउँसो फेसबुकमा सम्मान दिइरहेको अनुहारप्रति घृणा जाग्छ तर लेख्छु- हार्दिक बधाई र मेरो तर्फबाट शब्दपुष्पको सम्मोपहार ।
मोबाइललाई म झुठबोलक यन्त्र भन्छु । यो झुठसुनक यन्त्र पनि हो । मोबाइलले साँचो बोलेको हो कि झुटो भन्ने पत्ता लगाउन समयले एउटा आविष्कार गर्दैछ ।
अप्रिल फुल थिएन तर मलाई बिहानै एउटा फोन आयो- बधाई छ तिमीलाई अनि निम्तो पनि ।
हैन, निद्रा खुल्न पाएको छैन, बधाई दिन तलतल कसरी लाग्यो- मैले जिज्ञासा राखें ।
यन्त्रले बोल्यो- तिमीलाई सम्मान गर्दैछु । त्यसैले तिमीलाई बधाई र त्यसैको लागि निम्तो पनि ।
धन्यवाद पनि पछि नै दिन्छु र अनुकूल मिले मात्र तिम्रो निम्तो स्वीकार्छु- मेरो बक्रोक्ति फुत्क्यो ।
झस्केर बक्यो यन्त्रले- तिमी बाउँठे कुरो गर्ने भएर मात्र हो के तिमी पछाडि परेको ?
म- म तिम्रो पछाडि परेकै छैन त । तिमीले मेरो निद्रा खल्बलाइदियौ । र, राम्ररी थाहा छ मलाई आज मेरो दिन बिग्रियो ।
यन्त्र उवाच- तिमीलाई सम्मान गर्ने निणर्य गरेकोमा एउटा सम्मोपहार ल्याइदेऊ, है ?
अकमकिएर म- उपहार भनेको सहायक हारभन्दा माथिल्लो श्रेणीको हो । पहिलो हुनेले जितेको र दोस्रो हुनेलाई उपविजेता भनेजस्तै लज्जास्पद वा घृणास्पद हारभन्दा अलिकति लाज बचाएको हार उपहार हो ?
यन्त्र वचन – सोझो रूपमा चार बोटल विदेशी जाँड लिएर आऊ, सम्मान लिएर जाऊ ।
राम्रो म- मेरो नामको ठाउँमा त्यहीँ बोतलको नाम लेखेर सम्मानपत्र छपाऊ । म बोतल पठाइदिन्छु ।
यन्त्र- स्वीच अफ ।
मेरो मूड अफ । एक छिनमा म फ्रेस हुन्छु । दिउँसो फेसबुकमा सम्मान दिइरहेको अनुहारप्रति घृणा जाग्छ तर लेख्छु- हार्दिक बधाई र मेरो तर्फबाट शब्दपुष्पको सम्मोपहार ।
रौतहट
