नेपाली हास्यव्यङ्ग्य अनलाइन पत्रिका

(प्यारोडी भैँसी लड्यो है मायाको लयमा)

हाम्रा नेता है माया गफका भकारी,
गुड्डी हाँक्छन् है माया पैसाले डकारी ।

दलको झण्डा अंशबन्डा घरिघरि फण्डा,
जनतालाई झुक्याउन गर्छन् प्रोपगन्डा ।
राजधानीमा है माया घरबारी किनेर,
भोट माग्छन् है माया मोफसल हिनेर ।

चिल्लो गाडी, युवा खाडी, गाउँघरलाई छाडी,
हेलिकप्टर चढी आउन चाहिँछ पैरो बाढी ।
छोराछोरी है माया अम्रिका पढाउने,
जनतालाई है माया भोकभोकै लडाउने ।

प्रजातन्त्र, लोकतन्त्र, भन्छन् गणतन्त्र,
मिलाएर देश लुट्ने एउटै मूल मन्त्र ।
एम्सीसी र है माया एसपीपी हुलेर,
विदेशीको है माया प्रोजेक्टमा भुलेर ।

छ महिनामा मन्त्री फेर्ने आलोपालो खाने,
शेयर बजार घट्दै जाने मूल्य बढ्दै जाने ।
खानी, पानी है माया जवानी बिक्रीमा,
चैन उनलाई है माया जनता चाहिँ फिक्रीमा ।

दोषादोष र झोसाझोस छ, सत्ता खोसाखोस,
जनताको भागमा कठै सधैं असन्तोष ।
श्रीलङ्का झै है माया बन्दैछ देश,
ढेडुमाथि है माया थपिए गणेश ।

देश लङ्दैछ है माया भिरबाट हेर,
बत्तीस बर्ष है माया गैसक्यो लौ खेर ।

संखुवासभा