नेपाली हास्यव्यङ्ग्य अनलाइन पत्रिका

डा. बमबहादुर जिताली :

हास्यव्यङ्ग्य गीत (प्यारोडी)

जहाँ छन् गिद्धका आँखा, चनाखा छन् मनोहर
त्यहाँ छ भ्रान्तिको खेती घूसखोरी शिरोपर ।
प्राणभन्दा उही प्यारो धनको ढुकुटी तर
टल्किन्छ समता मेरो नातावादी निरन्तर ।

माया विकारको लाग्छ, नेपाली परिहासको
माया सिकारको लाग्छ, भाषा अर्कै प्रदेशको ।
नेताको तन्त्र यो जप्छु चौकीदार बनीकनै
जननी जन्मभू मेरी हिजोभन्दा लुली झनै ।

जहाँ छन् गिद्धका आँखा…

छ ठूलो चाहना चोखो, भ्रष्टाचारी नचाउने
सर्वोच्च पदमा पुग्ने अपराधी बचाउने ।
यै प्यारो भावना बोकी औतारी म बनीकन
पार्दैछु चाहना पूर्ण गरी देश विसर्जना ।

जहाँ छन् गिद्धका आँखा…

०००
नागार्जुन न.पा.–१, रानीवन, काठमाडौं
९८४१४९१०८१