नेपाली हास्यव्यङ्ग्य अनलाइन पत्रिका

तिज घन्काएर आयो, आउने दिन अगावै आयो , महिना दिन अगावै आयो । आउन त आयो दिमागै खायो । यो आयो, नेपालीले के पायो? लट्टे चाम्रे हैन रेष्टुरेण्टले रक्सि बेच्न पायो, कसैले …. पुतली भनेर गीत गाउन पायो, उसैले गीत कमायो । बुझ्नेलाई श्रीखण्ड, नबुझ्नेलाई खुर्पाको बिँड भनेको झैं, तीज कसैलाई अपरम्पार भएको छ कसैलाई मारामार भएको छ ।

अस्ति यौटी चेली आईफोनमा टिकटक बनाउँदै थिईन् । लगभग २० तोला सुनमा शरीरलाई झरिझुत्तै बन्धक बनाएर गह्रुँङ्गोसँग नाच्दै नाच्दै भन्दै थिईन- चरी जेलैमा । हो नी हजुर, त्यति धेरै गहना लगाएपछि महिलालाई घर बाहिर निस्किन सकस छ, बाहिर निस्के गहना हराउला भन्ने डर हुन्छ अनि घरमा नै गहना प्रदर्शनी गर्दा चरी जेलैमा हुँदैन र ?

विदेशमा श्रीमानको पसिनाको तेल बगाएर यहाँ चरी जेलैमा भन्नेको कमी रहेन । जसले यो गीत गायो, उसैको बारेमा कसैले हिम्मत राखेन बाहिर ल्याउनलाई तर अधिकांशले गीत गुन्गुनाईरहे नै । हिम्मत हुनेले त गएर बिष्णु माझीलाई सार्वजनिक गर्नु पर्ने नि किन गर्ने हिम्मत राखेनन् ?

बियर र रक्सि खाइदिएर चेलीले नाचे अनि चरी जेलैमा भनिदिए ? ल भन्नुस् त कसरी सुहायो भनेर भन्दा महादेवले नागको माला बाघको छाला लाउदा उही राम्रो हुने हामी चेलीले एक दिन वाईन खादैमा हजुरको के बिग्रने ? तपाईहरूको सोच नै हामीलाई जेलमा राख्ने सोच छ …. पो भन्छन् गाँठे ।

आजकाल बजारमा बस्ने अधिकांश चेली मेलामा जाँदैनन् । मेला र पर्म भनेको के हो भनेर शब्दकोषमा हेर्न पर्ने बेला भै सक्यो तर त्यही शब्द नजान्नेले मै छोरी रुँदै रुँदै बेसी मेलैमा भन्ने गीत गाउन सुहाउँछ र ? जीवन अभिनय मात्र भै दिएको भए हुने थियो नि तर जीवन भोगाई हो वास्तविकता हो नि । तर रेष्टुरेण्टमा गएर आधा जीउ मात्र ढाकेर नाच्दै चरी जेलैमा भन्न सुहाउँछ ?

राज्यले आरक्षण दिएको जागिर चेलीले नै पाएका छन् । जग्गाको लालपूर्जा यिनै चेलीको बढि हुन लागि सक्यो । गहना यिनै चेलीका बढि छन्, कपडा यिनै चेलीका बढि छन् । चाडबाड आउनु एक महिना पूर्व यिनलाई तिजको दिनमा नै के लगाउने भनेर तपस्या बस्न पर्छ । भन्छन् नि दराजमा कपडा राख्ने ठाउँ छैन, मै राँडलाई लाउन आउँदैन, हो त्यस्तै भएको छ । दराज भरी कपडा छन् तर तीजको दिन छुट्टै कपडा लगाउनु पर्ने तर गाउनु चाहिँ चरी जेलैमा गाउनु पर्ने ?

हातमा बाला लगाएर, घाँटीमा दाम्लो जत्रो गहना झुण्ड्याएर शरीरलाई नै सकस हुने गरि, भार पर्ने गरि चरी जेलैमा भन्न सुहाउला र ? जे होस्, सादा तिजको शुभकामना सबै चेलीलाई, चरी जेलैमा हैन चरी मेलैमा जान सिकुन् बेलैमा । तारेमाम् ।

०००
लमजुङ