नेपाली हास्यव्यङ्ग्य अनलाइन पत्रिका

उसो त प्रत्येक वर्षको बैशाख १ गते देखि नयाँ वर्ष सुरु हुन्छ नै, तर यसपालीको नयाँ वर्ष मेरो लागि खासको बनेर झुल्किने निश्चित बनेर आएको हुँुदा यो मेरो शुभ मुहुर्त बन्न पुगेको हो ।

मैले मेरो जीवनको ५९ वर्ष पार गर्न केही महिना र केही दिन मात्रै बाँकी रहेको बेला नयाँ सालसँगै मेरो नयाँ रुप देख्न पाउने भएको छु । मेरो नयाँ रुप कुनै केमराबाट खिचिएको तस्वीर वा छापाखानाको मेसिनले थिचिएको चित्र नभई क्यान्भासमा राखेर कुचीबाट म भएको आभाष हुने गरी सर्जक श्री राजेश मानन्धर (राजमान) बाट तयार पारिएको कार्टुन चित्र हो । जुन मेरो स्वयमको पहिलो कार्टुन चित्र हो र यसको शुभ मुहुर्त नयाँ वर्ष २०८० सँगै निस्किएको छ । कार्टुनको लागि राजेश मानन्धर ज्यूलाई धेरै धेरै धन्यवाद व्यक्त गर्न चाहन्छु ।

बिगत वर्षहरूमा राजमान ज्यूबाट श्रृजित धेरैका अनेकन कार्टुनहरू हेरियो, देखियो । ती कार्टुनहरूमा अनेकन टिकाटिप्पणी (कमेन्ट) पनि गरियो । अब भने मेरो आफ्नै कार्टुन उपरका टिकाटिप्पणीहरू पढ्न पाउने अवसर जुट्ने भयो । यसमा गरिने टिकाटिप्पणीले म लगायत सर्जक स्वयमलाई पनि प्रशस्तै फिडब्याक मिल्ने नै छ भन्ने आशा मैले लिएको छु ।

कोही राम्रा काम गरेर नैतिक कार्टुन बन्न पुगे । कोही अनैतिक काम गरेर कार्टुन बन्न पुगे । कोही बखानको त कोही उखानको, कोही करोडको त कोही अरबको, कोही जीतको त कोही हारको, कोही कारको त कोही बेकारको, कोही उतारका त कोही चडावका अनेकन कार्टुन हेरियो । तर मलाई मेरो कार्टुन असाध्यै मन पर्‍यो । आखिर यसरी पनि त कार्टुनमा आउन सकिंदो रहेछ, किन गर्नु बखान, किन भन्नु उखान ? किन माड्नु सुर्ति किन लगाउनु फुर्ति ?

उपर्युक्त कारणले नयाँ वर्ष २०८० मेरो लागि खास बनेर झुल्केको छ । यस उपलक्षमा सर्वप्रथम फित्कौली डट कमलाई नयाँ वर्ष २०८० को मंगलमय शुभकामना भन्न चाहन्छु साथै फित्कौली मार्फत नेपाली हास्यव्यङ्ग्य साहित्यका विभिन्न स्रष्टा, मेरा अग्रजहरूमा हार्दिक मंगलमय शुभकामना व्यक्त गर्न चाहन्छु । नयाँ वर्षसँगै मेरो नयाँ रुप तयार गर्नुहुने कार्टुनिष्ट महोदय राजेश मानन्धर (राजमना) लाई त झन धेरै शुभकामना छ । हामी सबैको जय होस् ।
नया वर्ष २०८० को मङ्गलमय शुभकामना ।

०००
गल्कोपाखा, काठमाडौं