नेपाली हास्यव्यङ्ग्य अनलाइन पत्रिका

किशन पौडेल :

एका बिहानै रेडियोले समाचारमा फुक्यो-
“विमानस्थलबाट सय किलो सुन समातियो ।”

दिनभरी समाचारपत्रहरू पहेँलपुर भए । सामाजिक सञ्जालहरू सुनका बिस्कुटहरूले भरिए । जनताहरूले जिब्रो टोक्दै कल्पनाको उडान भर्न थाले । जताततै सुनै, सुनले लेपन गरेको सुनको थुप्रोमा उफ्रेको देख्न थाले । कविहरूले भ्रष्टाचारी र तस्करीहरूलाई गाली गर्दै सुनका कथा, कविता लेखे सुनका कविताहरू भाइरल भयो ।

बेलुकी रेडियो नेपालले समाचार वाचन गर्दै भन्यो-
“बिहान भन्सारमा समातेको सुन सय किलो नभएर ६० किलो मात्र भएको कुरा नापतौल विभागले पुष्टि गरेको छ तौल गर्दा तराजुमा गडबडी भएको कुरा जानकारी प्राप्त भएको छ ।”

केहि समाचार पत्रहरूले कटाक्ष हान्दै लेखे भारु ६० किलो होला घोटाला भएको छ छानबिन हुनुपर्छ ।
जनता जनार्दनको गालीले सामाजिक सञ्जाल पुनः रन्कियो । बिहानको बेलुकै चालिस किलो सुन गायब गर्न पाइँदैन भन्दै फेसबुकमा उफ्रिन थाले । भएभरको आक्रोश ओकल्दै थाकेर सुते ।

भोलिपल्ट बिहानै रेडियोमा समाचार बज्दै थियो-
“हिजो समातेको सुन रातभरि गुणस्तर चेकजाँच गर्दा पित्तल ठहरिएको कुरा अनुसन्धान विभागले जनाएको छ ।”

०००
हेटौँडा- ४