नेपाली हास्यव्यङ्ग्य अनलाइन पत्रिका

डिल्लीप्रसाद अधिकारी :

उसको सामाजिक महानता नापिनसक्नु थियो । तर एकपल्ट उ श्रीमद्भागवत महापुराण सुन्न पुगेछ । त्यसपछि ऊ कृष्णको भक्ति पनि जीवनको एउटा गर्नैपर्ने कार्यमा लाग्ने भएको सनसनी फैलियो ।
“कृष्ण एकमात्र भगवान रहेछन्” -उसले भन्यो र अझै थप्यो- “भगवान भनेका निडर र निर्भीक हुन्छन्, भगवानलाई शस्त्रको जरुरी हुँदैन । कृष्णले शस्त्र लिएका छैनन् । बाँसुरी बोकेका छन्। त्यसैले कृष्ण भगवान हुन् ।”

उसको कुरा ठिकै थियो । तर उसको पाखण्डीपना र नास्तिकता कसरी अचानक कृष्ण भक्तिमा परिणत भयो यो भने आश्चर्यचकित हुने कुरा थियो । जे होस् यो सार्वजनिक महापुराणको आयोजनाले उसको जीवनशैली बद्लियो ।
“हैन, तपाईं त भगवानको अस्तित्व छैन भन्नुहुन्थ्यो त ?”- सोधेँ ।
“मलाई थाहा थिएन कि यो प्रकृतिको सञ्चालनमा पनि कसैको हात छ । तर अब बुझेँ संसार त कृष्णमय रहेछ ।” एल.बी. सरका नाममा चिनिने, उसले भन्यो ।
“सर, राम्रो भयो । तपाईंले उमेरको अर्धशताब्दी नाघेर भएपनि कृष्णलाई चिन्नुभयो ।”- भनिराखेर म छुट्टिएँ ।

एल. बी. सरको जीवनशैलीमा यो व्यापक परिवर्तन समाजका निम्ति पनि सञ्चको कुरा थियो । उसले रक्सी छोड्यो । मासु अभक्ष भन्न थाल्यो । कति राम्रो ।
“भनेपछि सर तपाईं साँझ बिहान पूजा पनि गर्नुहुन्छ होला नि अचेल त ?” – अर्कोपल्ट भेट्दा सोधेँ ।
“भक्तिका लागि पूजा आवश्यक छ र ?” -उसले उल्टै मलाई सोध्यो ।

“आवश्यक नहोला र पनि पूजापाठ पनि भक्तको एउटा चिनारी होइन र ?” -मैले पनि प्रश्न नै गरेँ ।
“अज्ञानीका लागि मात्र । ज्ञानीजनले त भगवानलाई सम्झेर आफ्नो कर्म गरिरहन्छ । कर्म गर फलको आशा नगर भनेर गीतामा भनेको छ ।” -एल.बीले भन्यो ।
“सर, कर्ममा तिम्रो अधिकार छ । फलमा छैन- पो भनिएको छ नि गीतामा ।” – यतिमात्र भनेर उसँग छुट्टिएँ।

अचेल एल. बी. सरको घरमा झगडा छैन । गाउँमा यही हल्ला छ । उनको आर्थिक सम्पन्नता पनि बढ्दै गएकामा उसका छिमेकीले भने कि कृष्णको भक्तिले उ दिनदिनै समृद्धशाली भइरहेछ ।

देशमा सरकार फेरियो । नयाँ सरकारले भ्रष्टाचारको छानबिन थालेपछि एल.बीको कृष्ण भक्ति झन् चुलियो । “श्रीकृष्ण गोविन्द हरे मुरारी, हे नाथ नारायण वासुदेव”- भजन उसका घरमा साँझ बिहान बज्न थाल्यो ।
एकसाँझ यही भजन घन्किरहेको उसका घरबाट उसलाई सतर्कता विभागका पुलिसले भ्रष्टाचारको मुद्दामा पक्रेर लगे ।
मलाई लाग्यो, यो भगवानको भक्ति पनि सबैलाई फाप्तैन रहेछ ।

०००
सिलगुडी