साइबर अपराध सम्बन्धी सचेतना सामग्री

फोर्ने फोर्ने – एक हौँ !

‘हो त फोर्ने भए फोरौँ । सब फोरौँ । घर फोरौँ, नाता फोरौँ, सम्बन्ध फोरौँ, समाज फोरौँ, पार्टी फोरौँ, सरकार फोरौँ, सकिन्छ र फाइदा हुन्छ भने देशै फोरौँ ।’ बजरङ्गी, ठाकुर र मोहम्मद दिगम्बरको प्रस्तावमा तयार भए ।

Nepal Telecom ad

डा. टीकाराम पोखरेल :

‘उ, उ, फेरि फुट्यो ।’ टिभी हेर्दाहेर्दै एक्कासी बजरङ्गी करायो ।
‘खै खै, के फुट्यो हँ ?’ अर्को कोठाबाट ठाकुर दौडिँदै बजरङ्गी भएको ठाउँमा आइपुग्यो ।
‘उ क्या उ टिभीमा ।’ टिभीतिर देखाउँदै बजरङ्गीले भन्यो ।
ठाकुरले टिभीतिर हेर्‍यो । टिभी फुटेको थिएन ।
‘होइन ए बजरङ्गी ! थोडी टिभी कहाँ फुटेको छ ? मज्जाले चलिराको टिभीलाई फुट्यो भन्छस् । तँ बहुलाइस् कि क्या हो ?’ ठाकुरले बजरङ्गीलाई भन्यो ।
‘टिभी होइन क्या, समाचार हेर्न समाचार ।’ बजरङ्गीले फेरि टिभितिर देखाउँदै भन्यो ।
ठाकुरले टिभीतिर हेर्‍यो । टिभीमा ठाकुरले हेर्दा फेयर एण्ड लभ्लीको विज्ञापन बजिरहेको रहेछ । ‘हाहाहाहाहा ….. हाहाहाहाहा… हाहाहाहाहा… ।’
ठाकुर अट्टाहटसँग हाँस्यो । उसको चर्को हाँसोको आवाज सुनेर माथ्लो तलामा बस्ने दिगम्बर, परमेश्वर र मोहम्मद पनि त्यहीँ आइपुगे ।

‘ए ठाकुर ! किन यसरी हाँसेको हँ ? तँ बहुलाइस् कि के हो ?’ दिगम्बरले ठाकुरलाई भन्यो ।
‘म बौलाएको होइन दिगम्बर, बरू यो बजरङ्गी बहुलायो । टिभीमा फेयर एण्ड लभ्लीको विज्ञापन आइराको छ । फुट्यो कि फुट्यो भनेर कराउँछ । थोडी फियर एण्ड लभ्लीले फुट्छ । यस्तो क्रिमले त बरु फुटेको गाला जोड्छ । चाउरी परेको गाला झरिलो बनाइदिन्छ । तर बजरङ्गी भन्छ कि फुट्यो ।’ ठाकुरले बजरङ्गीतिर सङ्केत गर्‍यो ।

‘अरे यार, मैले कहाँ गाला फुट्ने कुरा गरेको छु । मैले त पार्टी फुटेको कुरा गर्दै छु । फियर एण्ड लभ्लीको विज्ञापन आउनुअगाडि टिभीमा पार्टी फुटेको समाचार आइराको थियो । म गर्छु आग्राको कुरा ठाकुर गर्दैछ गाग्राको कुरा ।’ बजरङ्गीले दिगम्बरलाई स्पष्टीकरण पेश गर्‍यो ।
‘खै कहाँ फुट्या छ पार्टी ?’ मोहम्मदले अगाडि सरेर सोध्यो ।
‘भर्खरै त टिभीको समाचारमा आको थियो । तर अहिले गैसक्यो । थोडा तिमीहरुले हेर्न बाँकी छ भनेर समाचारले तिमीहरुलाई पर्खिन्छ र ? त्यहाँको माहौल हेरेर बजरङ्गीले पनि हल्का मजाख गरिदियो ।
‘पार्टी थोडी फुट्छ ? त्यो त पार्टी फुटेको होइन, नेता फुटेको हो नेता । पार्टी फुटकोमा परमेश्वरले हल्का आक्रोश पोख्यो ।

‘नेता कहाँ फुट्छ ? नेताको भूँडी हिजो जस्तो थियो, आज नि त्यस्तै छ । नेता फुटेको भा त थोडी नेताको त्यति ठूलो भूँडी चाहिँ कसरी बाँकी रहन्थ्यो ? बरू नेताको मन फुटेको होला । मोहम्मदले परमेश्वरको आक्रोशमा हास्य रस घोल्न खोज्यो । ‘हाहाहा… हाहाहाहा… हाहाहाहाहा… ।’ फेरि कोठामा सामूहिक हाँसो चल्यो ।
तर परमेश्वरको मुखबाट हाँसो खुस्किएको थिएन ।
‘कि हाम्रो यही हाँसो पनि फोरिदिउँ हो परमेश्वर ?’ आक्रोशित परमेश्वरलाई कुल गराउन दिगम्बरले अर्को तुक्का फाल्यो ।

‘कुरा हाँसोको होइन, कुरा सिरियस छ । यो पार्टी फुटेको पनि होइन, नेता फुटेको पनि होइन, नेताको मन फुटेको पनि होइन । बरु कुर्सी फुटको हो कुर्सी । एक कुर्सी फुटायो दो कुर्सी बनायो । एक पदलाई दो पद बनायो । दो पद चार बनायो । चार पद आठ । मिलेसम्म पद बढायो । बढाउन नमिले एउटालाई कुर्सीबाट झार्‍यो, अर्कोलाई चढायो । एउटा झर्‍यो, अर्को चढ्यो । फुटे पनि कुर्सी, उठे पनि कुर्सी । ओर्ले पनि कुर्सी, चढे पनि कुर्सी ।’ परमेश्वरले आफ्नो आक्रोश दर्शन छाँट्यो ।

‘ह्या छाड्दे यस्ता कुरा । फुटोस् कि जोडोस्, हामीलाई के मतलब । बरु फुटेर फाइदा हुन्छ भने हामी पनि किन नफुट्ने, किन नफोर्ने ?’ दिगम्बरले प्रस्ताव गर्‍यो ।
‘हो त फोर्ने भए फोरौँ । सब फोरौँ । घर फोरौँ, नाता फोरौँ, सम्बन्ध फोरौँ, समाज फोरौँ, पार्टी फोरौँ, सरकार फोरौँ, सकिन्छ र फाइदा हुन्छ भने देशै फोरौँ ।’ बजरङ्गी, ठाकुर र मोहम्मद दिगम्बरको प्रस्तावमा तयार भए ।
‘फाइदाको नै कुरो हो भने त फोरौँ न त फोरौँ ।’ एकैछिनमा परमेश्वर पनि फोर्नेमा सहमत भयो । परर्ररर….. समूहिक ताली बज्यो । तुरुन्तै नारा सुरु भयो ।
विघठन गर्ने – जिन्दावाद !
एकता गर्ने – मुर्दावाद !
फोर्ने फोर्ने – एक हौँ !
हाम्रो एकता – फेरि फोरौँ !

०००
काठमाडौं

Subscribe
Notify of
guest

0 Comments
Oldest
Newest Most Voted
Nepal Telecom ad
अनन्त शून्य

अनन्त शून्य

डा. टीकाराम पोखरेल
प्रेम शताब्दी

प्रेम शताब्दी

डा. टीकाराम पोखरेल
कामरेडसँग तीन भेट

कामरेडसँग तीन भेट

डा. टीकाराम पोखरेल
सदावहार गाईजात्रा !

सदावहार गाईजात्रा !

डा. टीकाराम पोखरेल
जात्रा चोर

जात्रा चोर

डा. टीकाराम पोखरेल
कवि बन्ने रहर

कवि बन्ने रहर

डा. टीकाराम पोखरेल
0
Would love your thoughts, please comment.x
()
x