नेपाली हास्यव्यङ्ग्य अनलाइन पत्रिका

डिल्लीप्रसाद अधिकारी :

भक्ति अफाप भएको एल. बी. सर जेलमा ६ महिना पनि बसेन । मुक्त भइहालेछ । खबर सुनियो । मलाई उसले केही दिनपछि फोन गर्‍यो-
“भरे साँझमा फूर्सद निकालेर आउनुस् न बातचित गरौँ ।”
“मलाई त फूर्सदै छ । तर विशेष कारण के होला यो निम्तोको ? – सोधेँ ।
“हैन, त्यस्तो विशेष त क्यै छैन । पोहोर सार्वजनिक श्रीमद्भागवत महापुराणका पण्डितलाई पनि बोलाएको छु । सरसल्लाह छ । खाना पनि यतै खाउँ र सरसल्लाह गरौँ भनेर नि !”- फोनमा उसले भन्यो। अब पक्कै एल. बी. सरले घरमा पुराण लगाउने विचार गरेछ भन्ने मैले बुझेँ ।

साँझमा म उसकामा पुगेपछि मेरो बुझाइ सही रहेछ भन्ने चाल पाएँ । सरकारी काम पनि गर्ने समय समयमा पुराणको आयोजना पनि गर्ने पण्डित उसका घरमा विराजमान थिए । प्रणाम गरेँ । उनले बस्ने सङ्केत गरे । एल. बी. सरले चिया मगाएपछि बातचित शुरू भयो ।

“तपाईंको निणर्य सही नै लाग्यो मलाई त । अहिले तपाईंजस्ता विद्वान मानिसको सत्तारूढ दललाई खाँचो पनि छ । त्यसैले नोकरीबाट ऐच्छिक अवकाश लिएर तपाईं सक्रिय राजनीतिमा आउनुस् । देशका लागि काम गर्नु त नागरिकको सौभाग्य हो ।”- चिया पिउँदै पण्डितले भनेपछि मैले थाहा पाएँ कि एल. बी. सरले अब सरकारी नोकरी छोडेर राजनीतिमा प्रवेश लिने भएछ ।

उसले भन्यो- “मैले मेरो जेल बसाइमा भगवद्गीताको अध्ययन गरेँ । र थाहा पाएँ कि हामीले कर्म गर्नुपर्छ । समाजका लगि र देशका लागि पनि । कर्म गर फलको आशा नराख भनेर भनिएको रहेछ गीतामा । मैले सरकारी नोकरी पनि राम्रोसँग गरेँ तर यसमा मलाई षड्यन्त्र गरेर जेलमा हाल्यो पहिलाको सरकारले ।”

अनि मतिर फर्केर एल.बी. मुखातिब भयो- “कसो भन्नुहुन्छ तपाईं ?”
“ठिकै हो । जसरी पनि देशको सेवा गर्नु हो । तर एउटा कुरा चैँ मलाई के लाग्यो भने गीतामा भगवान कृष्णले कर्ममा तिम्रो हक छ फलमा छैन- भनेका होइनन् र ?” – मैले भनेँ ।
पण्डितले “कुरा एउटै त हो”- भने ।

हो रहेछ । एल. बी.ले राजनीतिमा पस्ने निधो गरेछ । पस्नअघि उसले घरमै श्रीमद्भागवत महापुराण लाउने सर-सल्लाह गर्न बोलाएको रहेछ । मैले अनुमोदन गरेँ, चाहिएको त थिएन होला तैपनि । म एल.बी.कै घरमा रातिको खाना निलेर घर फर्केँ ।

महापुराणको निमन्त्रणा कार्ड छापिएको र उक्त अवसरमा देशका एक माननीय मन्त्रीले प्रमुख अतिथिको अभिभारा बहन गरेको कार्डमा उल्लेख रहेछ ।
अब मैले यो कथा लेखिसकेपछि एल. बी. सरका घरमा आयोजना गरिएको महापुराणमा सक्रियता देखाउनु छ । दुनियाँ अहिले देखावटी त गर्दछ ।

०००
रिनाक, सिक्किम