नेपाली हास्यव्यङ्ग्य अनलाइन पत्रिका

काशीनाथ मिश्रित :

बहुको अर्थ हो धेरै । दलको अर्थ नै पार्टी हो भन्ने लाग्छ यो लम्फुदासलाई । दल नेपाली, पार्टी अङ्ग्रेजी ! भाषिक अन्तर मात्र त होला । फेरि दल नै आइसकेपछि पार्टी किन जोड्नु ? अनौठो पनि लाग्ला । कतै भरखरै खुलेको झन्डै आठ दसवटा दलहरू गाँसिएको पार्टीमाथि व्यङ्ग्य कस्न थाल्यो कि भन्ने तर्क पनि गर्न सक्नुहुन्छ । हुन पनि हो आठ दसवटा दल जोडेर बनेको पार्टीलाई बहुदल पार्टी नभनेर किन अर्कै नाम राखेछन् कुन्नि नेताहरूले । यो चाहिँ खोपडीलाई खोस्रँदा पनि खोतल्न नसकेको कुरो हो । नेपाललाई स्वर्गै बनाउँछौँ भनेर पाका पाका अनुभवी नेताहरू मिलेर गठन गरिएको पार्टीलाई नै व्यङ्ग्य हान्न थाल्ने हो भने यो लम्फुदासको के हविगत होला । किन त्यसो गर्थेँ र ! पटक्कै होइन । बरु एक करोड सदस्य पुर्याउने घोषणा गरेका छन् , कतै सदस्यता पाइयो भने मन्त्री पो पड्काउन पाइन्छ कि ! त्यसैले त्यो पार्टीलाई छुँदै छुन्न । आइनोकाइनो नै गर्दिन ।

चुनाव पनि नजिक नजिक आउँदै छ लुखुर लुखुर । भरविश्वास भने पटक्कै छैन, कतै दुर्घटनामा परेर खुट्टा भाँचिने हो र हिँड्नै नसक्ने हुने हो ! अथवा टाउकाको खोपडी नै उछिटिएर सिल्टिमुर खाने हो । त्यसैले नजिक नआउँदै कक्रक्क परेर रोकिन पनि बेर छैन । खै शान्ति सुरक्षा नभै आउन दिँदैनौँ भन्नेहरू पनि छन् एका थरी । शुशिला मात्र भएर कहाँ हुन्छ? शान्ति पनि चाहिन्छ, सुरक्षा पनि चाहिन्छ । होइन गाँठे यो त सत्य कुरा नै हो नि । यस्तो कुरामा पनि विश्वास नगर्नु त भएन बा !

शान्ति, सुरक्षा र सुशिला मिले भने चुनाव जाबो चुड्कीको भरमा भैहाल्छ । त्यसैले एउटा पार्टी दर्ता गराउँ भन्ने सोचमा छु क्या म पनि ! परार सालको चुनावमा भरखरै खुलेको स्वतन्त्र पार्टीले ह्वात्तै चुनाव जितेको कहाँ बिर्सेको छु र? सबै स्वतन्त्रहरूलाई बटुलेर पार्टी बनाए जस्तै मैले पनि बहुदलीय व्यवस्थामा व्यवस्थाअनुकुलको पार्टी बनाउन नपाउने कुरै भएन । त्यसैले बहुदल पार्टी नामाकरण गरेर लागेको हुँ अभियानमा ।

पुराना त पुरानै भैहाले । तिनले केही लछारेनन् भन्ने कुराअझसम्म देख्नुभएको छैन भने मैन बत्ती बालेर हेर्नुहोस् । अब दस वर्षमा नेपाललाई सिङ्गापूर बनाइदिन्छौँ भनेर फेरि कसले पत्याउँछ ? बरु एक वर्षमै चकनाचुर बनाउँछौँ भन्ने हिम्मत गर्ने हो भने भोट पाइने कुरामा दुइमत छैन । त्यसैले हालै दर्ता भएका नयाँ पार्टीहरू जस्तै मेरो पार्टी पनि दर्ता गर्दै छु । विधान बनाउने काम सदस्यहरूको भेलाले गरिहाल्छ । बरु सदस्यता कस्तालाई दिने भन्ने चाहिँ पहिले नै टुङ्ग्याउनुपर्छ । पार्टीको विस्तृत नाम बुझेपछि उता हैन यता होलान् जस्तो लाग्छ एक करोड सदस्य त वामदेव बा ! के कुरा गर्नुहुन्छ तपाईँले !!

हुन त मार्क्स, लेनिन, माओ जस्ता दिग्गज व्यक्तिको नामका पार्टी नभएका होइनन् । अहिले त कुलमान पार्टी, बालेन पार्टी, साङपाङ पार्टी, रवि पार्टी, घनश्याम पार्टी, जनार्दन पार्टी जस्ता थुप्रै पार्टी खुलेको समाचारले हर्षित बनाएको छ । हाम्रै देशभित्रका व्यक्तिहरूको नामका पार्टी झन् बलिया होलान् नि विदेशी नामका भन्दा ! कि कसो ?

मलाई भने व्यक्तिको नामको पार्टी खोल्ने रहर मरिसक्यो । अलिक पुरातनपन्थी छु क्या म ।त्यसैले एमाले, नेका, राप्रपा, लोसपा जस्तै नामधारी पार्टी खोल्न चाहेको हुँ । नाम पनि खत्रै जुराएको छु क्या मैले ।

ए, खुट्टा नखोच्याइकन आउँदै गरेको चुनावमा भोट हाल्न औताइरहेका जनता जनार्दनहरू ! आउनुहोस् मेरो बहुदल पार्टीको सदस्य बन्नुहोस् । मेरो पार्टीको पुरा नाम थाहा पाउनुभयो भने सबै पार्टीबाट यता हाम फालेर आउनुहुने छ । ‘बहुदल’ अर्थात् बहुत हुलदङ्गा लफडा पार्टी हो क्या यसको पूरा नाम । त्यसैले यता आउनुभयो भने चुनावै नलडीकन जित्न सक्नुहुने छ । किनभने यस पार्टीमा हुलदङ्गा र लफडा गर्नेले मात्र सदस्यता पाउँछ । आतङ्क सिर्जना गर्ने, बुथ क्याप्चर गर्ने बानी परेकाहरूलाई सीधै केन्द्रीय सदस्यमा मनोनित गरिनेछ । लौ बहुदल पार्टीलाई विजयी बनाउनुभयो भने अहिलेकै संविधानअनुसार पनि तपाईँलाई प्रत्यक्ष निर्वाचित प्रधानमन्त्री बन्न कुनै माइकालालले रोक्ने छैन ।

आउनुहोस्, बहुदल पार्टीमा एकताबद्ध बनौँ र दुई करोड सदस्य पुर्यएर सीधै प्रधानमन्त्रीमा दाबी गरौँ । कसले देशको अरबौँ बजेट ध्वस्त गरेर चुनाव गरिराख्ने झन्झट गरोस् । बहुत हुलदङ्गा र लफडा गर्न सके प्रधानमन्त्री बन्न पाइने कुरामा त ढुक्क हुनुहोस् न ।
जय बहुदलीय व्यवस्था, जय बहुदल पार्टी !!

०००
गुल्मी
लुरुलुरु आउँदै गरेको चुनाव आइपुग्नुभन्दा एक सय आठ दिनअगाडि ।