नेपाली हास्यव्यङ्ग्य अनलाइन पत्रिका

रमेश समर्थन :

उनी सधैं ब्रह्ममुहूर्तमा उठ्छन् र आज पनि उठे । शाैचादिबाट निवृत्त भएपछि अलिकति व्यायाम, प्राणायाम र आफ्ना इष्टदेवकाे ध्यान गर्छन् र आज पनि गरे ।

त्यसपछि नुहाएर पूजाकाेठामा गई टुप्पीकाे शिखाबन्धन गरी स्ताेत्रपाठका साथमा शङ्खघण्ट बजाउँदै पाञ्चायन देवताकाे नित्य पूजा गर्छन् र आज पनि गरे ।

भगवान् काे प्रसादस्वरूप रक्तचन्दनको तिलक लगाउँछन्, चरणामृत र नैवेद्य खान्छन् र बिहानकाे सामान्य कलेवा खान्छन् र आज पनि खाए ।

तबसम्म सहयाेगीहरूले पसल खाेलिसकेका थिए र बिक्रीका लागि सामान तयार पारिसकेका थिए जसका लागि जीवित वस्तु उनले हिँजै पहाडबाट मगाएका थिए । उनी मधेसमा बस्नेका लागि पनि पहाडी वस्तु उपलब्ध गराउँछन् । उनकाे बाेली मिठाे छ, व्यवहार राम्राे छ र व्यापार पनि राम्राे छ ।

उनले हिजाे साँझ धाेएर भित्ताकाे किलामा झुन्ड्याइएकाे एप्राेन झिकेर लगाए, हतियारहरू र अचानाकाे निरीक्षण गरे र उपस्थित भइसकेका ग्राहकहरूकाे मागअनुसार मासु काट्दै, जाेख्दै, दिँदै र पैसा लिँदै गर्न थाले ।

उनकाे नाम पुरुषाेत्तम पाेखरेल हाे ।

०००
रूपन्देही