नेपाली हास्यव्यङ्ग्य अनलाइन पत्रिका

यो कार्यालयभित्र के कति जुका लाग्दा रहेछन् भनी
भन्ने आँट भएन साध्य नहुने सङ्ख्या जुकाको गनी
दर्ता गर्न गयो निवेदनतिरै थाल्छन् जुका टाँसिन
आँटे मार्न चुसेर औषधमुलो हामी नगर्ने किन ?
।१।

मोटा फाइलमा अचम्मसँगले छिर्दा रहेछन् जुका
टेकी कागजमा सुटुक्क बगली चिर्दा रहेछन् जुका
खल्ती छाम्नु रहेछ धर्म यिनको चौपट्ट अल्झाउँछन्
थाकेका खटिराहरू पनि चुसी झन् घाउ बल्झाउँछन्
।२।

ओहो के विधि चुस्न तौरतरिका जान्दा रहेछन् जुका
कुर्सी मुन्तिरबाट चुस्न सजिलो मान्दा रहेछन् जुका
कारोबार अवैध गर्छ जसले त्यो मित्र मान्छन् जुका
बाटो वैध समात्न खोज्दछ भने त्यो दुष्ट ठान्छन् जुका
।३।

फर्जी कागजपत्रमा पनि जुका जाग्दा रहेछन् अति
हाम्रो ज्यान चुसाउँदै सुकिसक्यो के हुन्छ खै उन्नति
एक्लै सुट्ट छिरेर गर्न नसके आफ्ना जुकाको जय
अर्को त्रास थपिन्छ नागरिकमा हुन्छन् जुका निर्भय
।४।

यो कार्यालयका हरेक तहमा यस्ता जुका लाग्दछन्
लाग्ने कारण खोज्नतर्फ नजुटौँ खोजे जुका भाग्दछन्
नाना रङ्ग र रूपका र कदका साना र ठूला जुका
बस्ने बास रहेछ ए मनुज त्यो खल्ती नदेखा लुका
।५।

मोलुङ -५ ओखल्ढुङ्गा