नेपाली हास्यव्यङ्ग्य अनलाइन पत्रिका

प्रतिपक्ष-प्रतिष्ठा र निधिको खै निष्ठा ?
बँदेल र बङ्गुरझैँ हसुरेछन् बिष्टा ।
खाने-खाने भाँडिएर खान्न भनी-भनी
पाएपछि कुम्ल्याएर मिले गनी-भनी ।

खाएका छन् जनताको करमाथि कर
हन्तकाली, अगस्तिको के को छ र भर !
खानलाई बाँचेका छन् धुर्त धुन्दुकारी
बाँच्नलाई खाने भए खान्थे आलु तारी ।

हिजोसम्म भन्ने गर्थे नयाँ हुन्छ राम्रो
आज फेरि भन्न थाले मिठो हुन्छ चाम्रो ।
चाम्रो मासु चपाउने चुली चढ्दै गए
पद, पैसा, पावरमा लोभी-पापी भए ।

सत्य, शिव, सुन्दर झन् सुकाउने भए
छक्का, पञ्जा खेल्नेहरू रमाउँदै रहे ।
जनताले रुचाउने लाँकुरीको बोट
ढालिदिए त्यो बोटमा नभेटेर नोट ।

धोक्नसम्म धोकेपछि रक्सी हुन्छ कस्तो ?
धर्म-सर्म, कर्मसँगै हुन्छ छोडेजस्तो ।
त्यसैले त मुलुकमा धर्म-सर्म छैन
धर्म छाडालाई भयो मोजमस्ती चैन ।

राष्ट्रप्रेमी दवाउन परप्रेमी उठे
परदेशी हँसाउन परधर्मी जुटे ।
कर्तव्य र अधिकार छैन बराबरी
अधिकार मात्र खोज्ने भए सर्वोपरि ।

पद, पैसा, पावर, मसल
देखेपछि लोभिए कमसल ।।

नागार्जुन-१, रानीवन, काठमाडौँ
९८४१४९१०८१