नेता आए पो भोट दिने
यहाँ त चुनाव आउँदा नेता भेषमा ठेक्दार आउँछ, गुन्डा तस्कर आउँछ भ्रष्टाचारी, व्यभिचारीको लस्कर आउँछ ।
चुनाव आएर मात्र के गर्नु ?
नेता आउनु पर्यो नि नेता
नेता आए पो बिकास आउँछ
गाउँ समाजले निकास पाउछ
यहाँ त नेताको भेषमा चोर आउँछ
ठग, फटाह, घुसखोर आउँछ
नेता त हाम्रो भाग्यमै छैन जस्तो
खाली नेताको रुपमा ढँटुवा आउँछ
काम न काजको लठुवा आउँछ
नेता आए पो हुन्छ
चाकरी गर्ने जुत्ता चटुवा आउँछ ।
यो देशमा नेता भए पो आउँछ
न भाको नेता कसरी आउँछ ?
दूरदराजमा कतै भए पनि
त्यो अगाडि आउन के पाउँछ ?
जसलाई नेता भनेर पठाए पनि
जनतालाई खाली झुक्काउँछ ।
चुनाव आएर मात्र के हुन्छ ?
नेता आउनु पर्छ नेता
नेता आए नीति, बिधि, पद्धति आउँछ
गाउँदेखि शहरसम्म समृद्धि छाउँछ
यहाँ त चुनाव आउँदा नेता भेषमा
ठेक्दार आउँछ, गुन्डा तस्कर आउँछ
भ्रष्टाचारी, व्यभिचारीको लस्कर आउँछ
नेताले टिकट नपाएर यिनले खै कसरी टिकट पाउँछ ?
यो पाली त नेता आयो होला भन्ने ठान्यो
आउँदा धोकेबाज, चालबाज आउँछ
नैतीकहिन, चरित्रहिन छलबाज आउँछ
त्यसलाई भोट हलेर जिताएपछि
यो देशले कहिले सुख शान्ति पाउछ ?
खै कसलाई पो भोट दिने ?
चोर, डाँका, फटाह सब नेता भन्दै आउँछ
जसले राम्रो गर्ला भन्यो त्यसैले धेरै ढुकुटी उठाउँछ ।
हे परमेश्वरी
यसपाली कम्सेकम एउटा नेता त दिलाई देऊ
जनताले पनि नेता चिन्न नसकेको हो कि ?
जनतामा पनि नेता चिन्ने अक्कल मिलाई देऊ ।
दाङ, हाल काठमाडौं