नेपाली हास्यव्यङ्ग्य अनलाइन पत्रिका

अस्ती मेरो बर्थ मनायौ, आज तिम्रो बर्थडे मनाम
हामी पनि के कम, आऊ बुढी यौटा टिकटक बनाम ।

कहिले पूर्णे मनाऔं कहिले औंशी मनाम
कहिले दशैं मनाऔं कहिले देउसी मनाम
कहिले इद त कहिले क्रिस्मस
एउटा पर्व पनि नछोडेर मनाम
आऊ बुढी यौटा टिकटक बनाम ।

तिमी गाई झैं बुरुक्क उफ्र, म राँगो झै उफ्रिन्छु
तिमी सवारी गर, म घोडा जस्तो कुप्रिन्छु
हामी पनि भाईरल हुनु पर्छ अरुभन्दा के कम
म आलीमा हिँड्छु तिमी धानमा हिँड झ्वामझ्वाम
गए एक मुरी धान त जाने हो
न हाम्रो जाने हो, हाम्रो बाको जाने हो
आज धान उखलेर धान दिवस मनाम
आऊ बुढी यौटा टिकटक बनाम ।

तिमी हाँगोमा चढ म तलबाट हल्लाउँछु
तिमी राँगोमाथि चढ म कोर्रा लाउँछु
भिरबाट हाम फाल म डोको थाप्छु
ऐया ऐया गर म तिम्रो खुट्टा दाब्छु
तिमी नागिन बन म बिन बजाउँछु
तिमी गाडी बन म हर्न बजाउँछु
कहिले जङ्गलमा जाम कहिले खोलामा जाम
आऊ बुढी आज, एउटा टिकटक बनाम ।

नाच्ने नआए को भो त ?
तिमी भ्याकुतो जस्तो उफ्र म फट्याङ्ग्रो जस्तो फट्किन्छु
तिमी माता जस्तो काम म मृतआत्मा जस्तो भट्किन्छु
तिमी कोइली जस्तो गाऊ म कागले जस्तो गाउँछु
तिमी बिद्या बालन भएर आऊ म इमरान बनेर आउँछु
म साडी लाउँछु तिमी दौरा सुरुवाल लाऊ
म छमछम नाच्छु तिमी ढोलक बजाऊ
म तिमीलाई चिमट्छु, तिमी मेरो गालामा चट्काऊ
म तिम्रो जगल्टा उखेल्छु, तिमी मेरो टुपी झट्काऊ
कसैलाई गाली गराैँ कसैको गरौं बदनाम
यति गरे कसो भाईरल न भइएला र ?
आऊ बुढी एउटा टिकटक बनाम ।

काठमाडौं