नेपाली हास्यव्यङ्ग्य अनलाइन पत्रिका

हेल्लो प्रजातन्त्रज्यू
सञ्चै ?
तिम्रो तन्त्रको मन्त्र त बुझी नसक्नु छ
प्रजा झन झन दुब्लाउदै जाने
नेता भए जति मोटाउदै जाने
नेतालाई रुघा लाग्यो भने
देश बिदेश गएर सरकारी खर्चमा उपचार गर्ने
जनतालाई भोक लाग्यो भने खाडी पुगेर मर्नुपर्ने
प्रजातन्त्र भनेपछि त प्रजाको हुनुपर्ने
तिमी त कहिले यो नेताको भयौ
कहिले त्यो नेताको भयौ
जनताको भन्दा पनि खै कसको भयौ भयौ ।

एउटा राजालाई फालेर दशौटा राजा बनायौ
प्रजातन्त्र दिवस पनि
प्रजासँग भन्दा विदेशीसित मात्र मनायौ
भन्ने बेला प्रजाकै लागि हुँ भन्यौ
तर बन्ने बेला पार्टिहरूको बन्यौ
नेता र कार्यकतालाई करोडपती बनायौ
जनतालाई कङ्गालपति बनायौ
खै यत्रो यो दिवस कसको लागि मनायौ ?

तिम्रो माइलो भाइ लोकतन्त्रले पनि त्यसै भन्यो
त्यो पनि नेताको लागि मात्र बन्यो
अर्को कान्छो भाइ गणतन्त्रको के कुरा गर्नु
त्यो अल्लारेको झन के भरोशामा पर्नु
जो धनी छ ऊ कौशी तरकारी फलाउछ
जो गरिव छ त्यो माथि
तिम्रो कान्छो भाइ गणतन्त्र डोज्जर चलाउँछ

जनतालाई बाँच्न झन धौ धौ भा छ
कसैको लागि प्रजातन्त्र फलिफाप नै भा छ
भन त प्रजातन्त्र प्रजाको प्रजातन्त्र कहिले आउँछ ?
के त्यो प्रजातन्त्र जनताले साच्चै भोग्न पाउँछ ?

०००
काठमाडौं