नेपाली हास्यव्यङ्ग्य अनलाइन पत्रिका

तिमी डढेलोमा बाबियो सप्रेको देख्छौ !
तिमी बाढीले मलिलो माटो ल्याएको देख्छौ !
तिमी भुइँचालो जाँदा पुनर्निर्माण को सपना बुन्छौ !
अझ तिमी महामारीको बेला
नयाँ नयाँ अनुसन्धान आउने कल्पना गर्छौ !
तिम्रा आँखा र मेरा आँखामा भिन्न्नता छ !
भयो, नभनिहालौं !
यत्ति हो,
म डढेलोमा, हरियाली सखाप भएको देख्छू !
म बाढीले, बस्ती उठिबास लाएको देख्छु !
म भुइँचालोले,अनगिन्ती सपनाको चिहान पारेको देख्छु !
म महामारीमा मानव सभ्यताले हिक्का छाड्दैछ, देख्छू !
हुनसक्छ,
तिम्रा आँखा स्वस्थ छन् र सद्दे छन् !
हुन सक्छ,
मेरा आँखा रोगी छन् र धमिला छन् !
म ऐले आँखाको
उपचारमा ब्यस्त छु,
ओखतीका बूँद चुहाउँदै छु, आँखामा ।
ए भलामानुस !
यति खेर,
मलाई नचलाऊ !
मलाई नहल्लाऊ !!
अन्धो ! हुनसक्छ आँखा !
एउटा अनर्थ हुनसक्छ !
अपूर्व !!

भैरहवा