खगेन्द्र नेउपानेबेकार मास्टर हुनुभो !
ए हजुर ! मास्टर हुनु भनेको केही नहुनु हो ? मास्टर बन्नु भनेको केही नबन्नु हो ? ठिकै छ त्यसैले त मास्टर आफू केही बन्दैन अरुलाई बन्नुपर्छ भनिरहन्छ ।
कतै चोक बजारमा
घतिलो ठट्टा गर्नु हुन्न
कुनाबाट एउटा बोलिहाल्छ
सर, तपाईं त कमेडियन हुनुपर्ने बेकार मास्टर हुनु भो ।
दुईचार बुज्रुकहरूबीच
एक दुई तर्क राख्नु हुन्न
अर्को विद्वान उकास्छ
सर, तपाईं त वकिल हुनुपर्ने बेकार मास्टर हुनु भो ।
कुनै अवसरमा
शब्द सुर मिलाउनु हुन्न
अर्को उस्तै माया गर्छ
सर, तपाईं त गायक हुनुपर्ने बेकार मास्टर हुनु भो ।
कुनै गोष्ठीमा
काव्य सृजना वाचन गर्नु हुन्न
कुनै प्रशंसक भन्छ
सर, तपाईं त कवि हुनुपर्ने बेकार मास्टर हुनु भो ।
माष्टरले शास्त्रीय कुरा गर्यो भने
सरले त पण्डित हुनुपर्ने भन्छन्
दर्शन इतिहास संस्कृति र अभिनयका कुरा गर्यो भने
त्यसै भन्छन्
कुनै मञ्चमा अधिकारका कुरा गर्यो भने
भन्छन्
सर, तपाईं त नेता हुनुपर्ने बेकार मास्टर हुनु भो ।
ए हजुर ! मास्टर हुनु भनेको केही नहुनु हो ?
मास्टर बन्नु भनेको केही नबन्नु हो ?
ठिकै छ
त्यसैले त मास्टर आफू केही बन्दैन
अरुलाई बन्नुपर्छ भनिरहन्छ ।
गौरदह, झापा
Subscribe
Login
0 Comments
Oldest
