नेपाली हास्यव्यङ्ग्य अनलाइन पत्रिका

पुर्णे चन्द्रविना मसी रङविना बास्नाविना बाबरी
उस्तै हुन्छु तिमीविना म अधुरो धागोविनाको जरी
हाम्रो प्रेमिल सिन्धुमा विष घुल्यो छ्यौ युद्धवेत्ता तिमी
हारेझैँ गरुँला म युद्ध नलडी बन्नू विजेता तिमी ।
।१।
भन्छन् दर्पणमा म वृक्ष सुरिलो बाङ्गाहरूले कतै
बेच्छन् वस्त्रहरू बसी पसलमा नाङ्गाहरूले कतै
आफैं खाद्य फलाउँदैछु रसिला भन्दैछ बाँझो जिमी
हारेझैँ गरुँला म युद्ध नलडी बन्नू विजेता तिमी ।
।२।
हामीले अब बुझ्नुपर्छ थपडी मार्नेहरूका कुरा
माछा मार्न भनी तलाउ धमिलो पार्नेहरूका कुरा
छेपारे रङले दिँदैछ दिलको तस्वीर मायाविनी
हारेझैँ गरुँला म युद्ध नलडी बन्नू विजेता तिमी ।
।३।
सीमामा जुन सिन्धुतुल्य गुरु छन् श्रद्धा सुसायो बगी
ठाडो पार्न सिकाउने छ शिर जो झुक्ला उसैका अघि
चिन्ने चिन्दछ चिन्नुपर्छ चिनियो को नीम हो को चिनी
हारेझैँ गरुँला म युद्ध नलडी बन्नू विजेता तिमी ।
।४।
कालो मेघ चिरेर ए प्रियतमा भेट्ने गरी आउँला
सारङ्गी मुटुको लिई कलमले रेट्ने गरी आउँला
एकाकार भई गरौं सँगसँगै यात्रा हजारौं किमी
हारेझैँ गरुँला म युद्ध नलडी बन्नू विजेता तिमी ।
।५।
टाढा सिन्धु छ बग्नुपर्दछ नदी त्यागेर आडम्बर
बाटो छेक्न पहाडले हठ गर्‍यो लौ नागबेली पर
जित्ला सत्य अवश्यमेव नभमा झुल्केर सौदामिनी
हारेझैँ लडुँला म युद्ध कविता बन्नू विजेता तिमी ।
।६।

पञ्चेश्वर-६, बिजुल, बैतडी