नेपाली हास्यव्यङ्ग्य अनलाइन पत्रिका

शिक्षा, स्वास्थ्य, सुरक्षाको करबाट कार
किन्न किन तम्सेको छ होली सरकार ?
होली वाइन धोकेकाले गरेका छन् मस्ती
जनताले बेकारमा बोकेका छन् सास्ती ।

करमाथि कर थपी जनसेवा आयो
जनकर भएभर कारले नै खायो ।
घर बने भयङ्कर नेताजीका तर
भुँडीसुँडी सुम्ल्याएर भए अजिङ्गर ।

हस्पिटल भित्र उनै साँचो लुकाउँछन्
बन्द कोठा फुटाएर डोरी फुकाउँछन् ।
सोह्रै आना मार्ने मान्छे, जतातिर भाग्छन्
त्यतैतिर प्रहरीका पैसा पछि लाग्छन् ।

‘चील आयो’ भन्दै स्याल साँप्रो चपाउँछन्
त्यसै गरी बङ्गुरले नेता नचाउँछन् ।
नीति छाडा नेताजीले भद्रगोल पारे
ढुकुटी नै कुम्ल्याएर विदेशमा सारे ।

परदेशी रिमुटले चलेको छ देश
रिमुटमा चल्नुपर्ने पारे परिवेश ।
बङ्गुरका डङ्गुरले शान्ति डाकिँदैन
हुँडारका हुकुमले देश हाँकिँदैन ।

सदनमा जोडाजोडी घोडाघोडी गए
विदेशीले खेलाउने छौँडाछौँडी भए ।
अरिङ्गालजस्ता भए मन्त्रीतन्त्री कुनै
भयङ्कर अजिङ्गर भकारीमा उनै ।

बेकारमा युवाहरू जान थाले उता
कार चढी नेताहरू खान थाले यता-
भालेपोथी घुरानमा घुर तताउँछन्
हा.टा. गरी सदनमा भत्ता पचाउँछन् ।

नेता, सेता नभएर काले हुन थाले
भालेहरू अघाएर पोथी च्याप्न थाले ।
जात्रामाथि जात्रा चल्यो, चल्यो खाईजात्रा
जान थाले युवाहरू बोकी आत्रामात्रा ।

नागार्गुन न.पा.-१, रानीवन, काठमाडौँ