नेपाली हास्यव्यङ्ग्य अनलाइन पत्रिका

नेपाली ममचा बने दिन-दिनै देखिन्छ को रक्षक ?
नेपाली जन सेकुवासरि भए को-को बने भक्षक ?
यस्तो विघ्न विकासको परिधिमा सत्ता घुम्यो फन्फनी
बन्ने लक्षण देखियो मुलुक यो जापानभन्दा धनी !
(१)

नेपाली जनता भएर मुरली नेता भकारी भए
नेता लम्पट छन् भकुर्न जनता भारी भिखारी भए
नेताका घटमा बलेर बिजुली सर्वोच्चता चर्कियो
हाम्रो देश विकासको रहरिलोे सम्भावना घर्कियो ।
(२)

नोटैनोट लिएर यो बखतमा नेता भए उन्नत
भोटैभोट दिएर मालिक हुने मौका भयो सिर्जित
यस्तो चाल चलाउने चलनको जाग्दो छ खाँडो किन ?
मालामाल हुने र राष्ट्र दुहुने आए सुनौला दिन ।

(३)
हाम्रो देश हराभरा चहकिलोे वैकुण्ठ पो हुन्छ कि !
हाम्रो शान्त, उचा, प्रसिद्ध महिमा दन्ते कथा बन्छ कि !
मौलाएर दरिद्रता दिनदिनै बन्दै छ झन् उर्वर
आई दुर्दिन राष्ट्रको ढुकुटी नै बन्दै गयो जर्जर ।
(४)

भोका छन् जनता भनी अलिकता नेता लिँदैनन् पिर
नेपाली जनता झरे तलतलै उठ्नै नसक्दा शिर
नेताका घर छन् विशाल चुचुरा राता र काला कुन
यस्तो तीब्र विकासले गति लियो आकाश छोयो झनै ।
(५)

नेपाली गरिमा पुग्यो पुछरमा दायाँ र बायाँ गरी
बाटो एक अनेक रूप गतिमा बढ्दै गयो तस्करी
नेताले सुख-शान्तिसाथ जिउने बाटा अनेकौँ खनी
ऐले देश बन्यो विचित्र गतिमा जापानभन्दा धनी !
(६)
काठमाडौं