नेपाली हास्यव्यङ्ग्य अनलाइन पत्रिका

अरिङ्गालहरू आई महको तह झार्दछन्
मौरीको जिन्दगी खाई सृष्टिचर्खा बिगार्दछन् ।
१.

मौरीको घार तोडेर मलसाँप्रो पस्यो जब
नासिए रचना नाना भत्किए चाहना सब ।
२.

वनका चितुवा आई रजाईँ गर्न खोज्दछन्
गाईको रक्त तन्काई मान्छे पो मार्न खोज्दछन् ।
३.

गाई मारी गधा पोस्ने नीतिलाई सकार्दछन्
निर्धालाई हकारेर बलियाले डकार्दछन् ।
४.

लाम्खुट्टे-उपियाँजस्तै चुसाहा छन् थरी-थरी,
बाघजस्तै बनी मान्छे, मान्छे मार्छन् घरी-घरी ।
५.

डाँफेको ममचा खाई चपाई चाँचरी चरी
मान्छे बाज बने धेरै मासिए कोइली चरी ।
६.

गोरुहरू हलो छोडी नीति-निर्माण गर्दछन्
भेडाहरू भजाएर भकारी टन्न भर्दछन् ।
७.

गधा गदा उठाएर लोकतन्त्र चलाउँछ
गाईले कष्ट भोगेर जिन्दगानी चलाउँछ ।
८.

ठूला माछा दुलाभित्र सानालाई चपाउँछन्
मान्छेलाई चुसी मान्छे मोटा बन्न रुचाउँछन् ।
९.

मत्स्य-न्याय अँगालेको मान्छे नै हुन्छ दानव
मान्छेजस्तै बनी मान्छे कहिले हुन्छ मानव ?
१०.

काठमाडौं