नेपाली हास्यव्यङ्ग्य अनलाइन पत्रिका

१
नयाँ वर्षमा हर्षले मुस्कुराऊँ
बिहानी भयो जोसले जुर्मुराऊँ
नयाँ वर्ष सङ्घर्षको याम होला
दरा पाइला होस राखी चलाऊँ
२
नयाँ भावना गीतमा गुन्गुनाऊँ
नयाँ काव्य-भाषा सभामा सुनाऊँ
नयाँ वर्षमा आइलाग्लान् चुनौती
समस्या लघारेर टाढा भगाऊँ
३
प्रजातन्त्रको मन्त्र यो काम लागोस्
सधैँ स्वच्छ संयन्त्रको याम जागोस्
जहाँ हुन्छ षड्यन्त्रको बोलबाला
त्यहाँ पारदर्शी नयाँ घाम लागोस्
४
नहोस् देश अन्योलको राजधानी
बनून् देशवासी सबै स्वाभिमानी
भगाएर आलस्यको सुस्त बानी
युवा-भावनासाथ जागोस् जवानी
५
सुरक्षा प्रणाली बनाएर चुस्त
बनून् व्यक्तिका जिन्दगी तन्दुरुस्त
सधैँ सप्रियोस् सिर्जना यो समस्त
नहोस् देशको तेजिलो सूर्य अस्त
६
जहाँ जुर्मुराएर हिँड्छन् जवान
त्यहाँ उठ्छ पक्कै सही स्वाभिमान
जहाँ जुट्न सक्छन् सधैँ नौजवान
त्यहाँ झुल्किएला सुनौलो बिहान
७
उदाई नयाँ सूर्यको तेज आज
जुरुक्कै उठोस् यो सुतेको समाज
युवाशक्तिको जोसमा होस आओस्
नयाँ वर्षमा देश यो मुस्कुराओस्।

काठमाडाैं