नेपाली हास्यव्यङ्ग्य अनलाइन पत्रिका

आज भोलि सबैलाई नभै हुन्न नोट
नोट दिन सक्नेलाई दिनुपर्छ भोट ।
मैंलेजस्तो यो देशमा कल्ले गर्छ कर्म
आजसम्म घूस खाको छैन धरोधर्म ।

सुरा पार्टी उठेपछि भोट कल्ले दिन्न
देश स्वर्ग बनाउने बोतल छ चिन्ह ।
घरैपिच्छे बोतल छन् छैन कल्ले भन्छ
मैंले जितेपछि मात्र देश स्वर्ग बन्छ

सदस्यले भरिएको सातै क्षेत्र मेरो
नजित्ने छ त कुरै छैन सुरा पार्टी मेरो
जनताले बुझेका छन् बोतलको गुन
मैले जिते देशैभर फल्छ सुनैसुन ।

तास जुवा जाँड रक्सी फिरी हुने गर्छ
धाराबाट पानी हैन, जाँडरक्सी झर्छ ।
गाई भैंसी पाल्ने दुःख गर्नुपर्ने छैन
धोको फेरी जाँड धोकी गर्नुहोला चैन ।

म त हजुर भित्रभित्रै भोट तान्ने गर्छु
छोरीलाई जिताउने छाप हान्ने गर्छु ।
अलिकति तानेपछि रमाउँछ मन
नौ नम्बरी धन्दा गरी भित्र्याउँछु धन ।

भ्रष्टाचारी, तस्करीको खुलानीति लिन्छुु
जनताले चाहे जति भट्टी खोलिदिन्छु
सुरा पार्टी उठेको छ भोट दिनुहोल ा
भोट दिने भोटरको भरिदिन्छु झोला ।

नागार्जुन नपा-१ रानीवन काठमाडौँ