नेपाली हास्यव्यङ्ग्य अनलाइन पत्रिका

चुनाव अघिको त्यो रात- १

रातारात अनेकौं
खुराफात गर्छ त्यस रातले ।
मौन रहेर पनि
भित्र घात गर्छ त्यस रातले ।
सुइँको नपाइ,
भुइँचालो जान्छ त्यस रातमा,
अँध्यारो कुनामा
करामात गर्छ त्यस रातले ।

चुनाव अघिको त्यो रात- २

धर्म-सम्प्रदाय,जातपातको अनुपात,
मिलाउँछ त्यस रातले,
कसको भागमा कति सौदाको खात, दिलाउँछ त्यस रातले,
को जान्छ पार को डुब्छ मझधार
गरिन्छ जोड- घटाउ,
लोकतन्त्रका आँखाका तप्केनी
चुहाउँछ त्यस रातले ।

चुनाव अघिको त्यो रात-३

विश्वास साटासाट गर्छ,
त्यस रातले
प्रलोभन बाँडफाँड गर्छ,
त्यस रातले,
असहमत मतलाई,
बनाउन सहमत,
निर्घात उत्पात गर्छ,
त्यस रातले ।

विराटनगर