नेपाली हास्यव्यङ्ग्य अनलाइन पत्रिका

चौध वर्षको उमेरमा
मैले पहिलोचोटि थाहा पाएँ
बन्दुकको सौन्दर्य !

र गाउँको गरिब स्कुलबाट
पहिलोचोटि
सपना खोज्दै भागेँ म
एउटा उन्मुक्त जङ्गलतिर !

बोक्सीकाँडाको कुरूप झाङभित्र
पहिलोचोटि
फ्याँकिदिएँ किताबको झोला !

र हातको निरीह कलम भाँचेर
पहिलोचोटि
समातें बन्दुक !

पहिलोचोटि
मेरै उमेरकी युवती कमरेडको
हातमा हात ठोकिँदा
महसुस गरेँ-
करेन्टको तीव्र झट्का !

र पहिलोचोटि
मैले देखेँ-
उसको छातीमा चलमलाइरहेको
सेतो सर्प !
पहिलोचोटि
मेरो हातमा मुस्कुरायो बन्दुक
र दबाएँ जीवनको ट्रिगर !

पहिलोचोटि
मेरो हातबाट छुट्यो गोली
र सुनेँ एउटा सुमधुर सङ्गीत !

पहिलोचोटि
शिरमा गोली लाग्दा
घाँसको भारी बोकेर
उकालो चढिरहेको
मेरै उमेरको दुश्मन
एउटा निरीह चरोजस्तै
गीत गाउँँदै जमिनमा ढल्यो !

र पहिलोचोटि भिजेँ म
रगतको सङ्गीतमा !

पहिलोचोटि
जङ्गली फूलहरूमा
चम्किरहेको देखेँ-
मान्छेको रगत !

र मैले पहिलोचोटि
त्यही रगतले पखालेँ
हातका औंलामा लागेका
मसीका नीला दागहरू !

मेरा पुराना दुश्मनहरू
पहिलोचोटि डराए मसँग !
मलाई बारम्बार प्रश्न सोधेर
सताइरहने
स्कुलका मास्टरहरू पनि
पहिलोचोटि
हात जोडेर रोए मसँग !

पहिलोचोटि
दुश्मनको गोली लागेर
आफ्नै अगाडि ढले
असङ्ख्य सहयोद्धा कमरेडहरू !

पहिलोचोटि
दुश्मनको घेरामा परेर
छटपटाइरहेका
घाइते छापामार साथीहरूलाई
डोकामा बोकेर भगाउन नसक्ता
उनीहरूको शिर काटेर
रुँदै भागेँ म !

बाह्र वर्षसम्म
रगतको नदीमा
निरन्तर बगिरह्यो समय !
बाह्र वर्षसम्म
लासको टाकुरामा
निरन्तर अस्ताइरह्यो सूर्य !

र पहिलोचोटि समाप्त भयो
एउटा कुरूप
र निरङ्कुश अन्धकार !

बाह्र वर्षपछि
आज म
छब्बीस वर्षको भएको छु !

यतिखेर सम्झिरहेको छु-
रुखको उदास छहारीमुनि
बन्दुकको सिरानी हालेर सुतेका
जीवनका अँध्यारा रातहरू !

म सम्झिरहेको छु-
निस्पट्ट अँध्यारो रातमा जन्मिएका
असङ्ख्य रक्तिम सपनाहरू !

र मलाई आज
पहिलोचोटि
डर लागिरहेको छ-
मेरो जीवनका बाँकी वर्षहरूमा
अब के के हुने हो
पहिलोचोटि ?

(२०६६)