नेपाली हास्यव्यङ्ग्य अनलाइन पत्रिका

दुई मित्रहरू पचास बर्षदेखि आत्मीय, उही गाउँमा, उही स्कूल, उही उही सबै कुरा, सत्यनारायण चौधरी र विवेकनारायण गिरोपाध्याय । हरेक दिन भेटेर अनेक विषयमा गफ गर्थे । सामान्य जानकारी राख्थे हरेक कुराको ।

प्रोफेसर विवेकनारायण उमेरले अलिकता जेठो मात्र होइन, सत्यको गुरु पनि, अझ कुलगुरु । बैकुण्ठनगरका सम्पूणर् महतो र चौधरीहरू प्रोफेसरको चेलाचेली। “मुही चौधरी जे !” थारू भाषामा प्रवचन नै दिने क्षमता छ, विवेकमा। “सर यो चुनावको खास असर के होला ?” सत्यको प्रश्न ।

विवेक बोल्यो, “बबुवा, यो केही पनि होइन । तात्विक अन्तर केही हुन्न । सबै उस्तै भएको कुरा हामीलाई दीर्घकालीन जीवन भोगाइले सिकाएको छ । खास खास पात्रहरूको लागि यो महाभारत हो, नत्र धेरैको लागि रामायण । सत्यसित सत्य कुरा, विकाश भैरहेको छ । यो हुन्छ । हाम्रो गाउँमा भएको छैन र परिवर्तन ?अलि बढी इमानदार आएमा अलि बढी काम हुन्छ । चेला, आमलाई खास सरोकार छैन । स्वाद पाएका, इजी मनीमा बानी परेका, धाक रवाफ जमाउन पर्नेहरूका लागि यो जित्नैपर्ने, नत्र भने, यो केही होइन । जसरी पब्लिक क्याम्पसमा जागिर खाने ९५%लाई संस्थाको खास माया हुन्न, किन कि अन्त पनि जागिर हुन्छ, त्यो गाडी कुर्ने प्लेटफर्म हो, राम्रो अवसर पाए टाप !

त्यसैगरी, फेसबुकमा जति हाय तौवा गरे पनि ९८% आमलाई राजनीतिसित खास सरोकार छैन । कत्ति पनि छैन । आफ्नो आफ्नो भलाइ आफैंले सोच्ने हो । आफ्नो घरको, जिन्दगीको समस्या आफैंले समाधान गर्ने हो । भोल्टेयर सम्झे पुग्छ । सत्य यही हो । बाहिर मुखले जे पनि भन्न सकिन्छ । सम्पूणर् दलहरू नै ट्रेड यूनियन हुन्, अनुभूत तथ्य !

ठिक त्यतिखेर, प … र बाट एक पात्र आएको देखेर सत्यनारायण जान खोज्यो । अलि सक्पकायो । जहिले पनि त्यो तेस्रो पात्र आयो कि सत्य उठेर भाग्ने । विवेकले यो कुरा धेरै दिनदेखि अनुभूत गरिरहेको थियो, सोध्न नसकेको मात्र । कानून पनि पढेको र राजनीतिमा पनि सहभागी हुने,चर्कै बहस गर्ने मात्र होइन, आफ्नै कुरा माथि पार्नुपर्ने एक हठी पात्र “तर्कनारायण हल्लुडो” हो,त्यो पात्र । किन जान खोजेको ? किन सत्य ? त्यो हल्लुडो आएपछि तिमी जहिले पनि टाप ! मुख कुल्ला गरेर हिड्ने ! किन यार ? किन ? त्यो तर्के देखेर किन तर्किएको ?”

“गुरुदेव, जब तर्कको उपस्थिति हुन्छ, तब सत्य गायब हुन्छ भनेर पढाउनुभएको होइन ? सुतर्क गरे पो, कुतर्कको पहाड बनाउने, यति झूट तर्क गर्छ, फेरि उसैले जित्नुपर्छ । उसले नजिते प्रलय आउनेजस्तो । मलाई त्यो मान्छेको मुख पनि हेर्न मन लाग्दैन ।” तर्क आयो, सत्य गयो । अबको वार्ता विवेकनारायण र तर्कनारायणको बीचमा, गफ के के भयो ? मतगणनाको नतिजापछि । “के सत्यलाई तर्कले विस्थापित गर्ने नै हो ?” प्रोफेसरको मनमा कुरा खेल्यो ।

चितवन