नेपाली हास्यव्यङ्ग्य अनलाइन पत्रिका

लौरोको महिमा बढेर अहिले नेताहरू रुष्ट छन्
लौरो नै बलियो बनेपछि यहाँ भन्छन् नयाँ दुष्ट छन्
बैंसे जोस झिकेर यो शहरमा मान्छे बनुन् निर्भर
बन्लान् मार्ग सफा जसै तरहले नेपाल होस् सुन्दर ।१।

लौरो आश र खास हुन्छ चतुरो देखून् युवा शासन
पढ्लान् पाठ नयाँ बुझेर सहजै गल्ती नहोस् भाषण
लौरो भार नहोस् घमण्ड बटुली फाले तिमी त्यो पर
बन्लान् मार्ग सफा जसै तरहले नेपाल होस् सुन्दर ।२।

अस्ताए रवि जो जसै तरूहरू पल्टे लडे मातले
फुट्दा भाइसँगै लड्यौ नि नबुझी छोड्यौ खुशी हातले
लौरो सभ्य र भव्य होस् नगरको लाग्दैछ तिम्रै भर
बन्लान् मार्ग सफा जसै तरहले नेपाल होस् सुन्दर ।३।

पोखे रोष यहाँ बुझेर जनले फाले बढारीकन
नातावाद सधैं बढ्यो अनि पुगे आक्रोशमा सज्जन
छन् फोहोर जताततै सडकमा छिट्टै सफाई गर
बन्लान् मार्ग सफा जसै तरहले नेपाल होस् सुन्दर ।४।

लौरो होइन त्रास गौरव बनोस् सन्देश राम्रो दिनू
भुत्ते भो हँसिया हलो खिइसक्यो भन्ने बुझाई दिनू
कुर्सी स्वार्थविहीन होस् मुलुकको जान्यौ कि हे भर्खर
बन्लान् मार्ग सफा जसै तरहले नेपाल होस् सुन्दर ।५।

सिक्दै आपसमा गरौं कलमका छन् धेर सम्भावना
नारी वा नर एक हौं मुलुकका सद्भाव राखौं घना
नेपाली हुनुमा छ गर्व गतिलो यस्तै बुझे के छ र ?
बन्लान् मार्ग सफा जसै तरहले नेपाल होस् सुन्दर ।६।

सानाेठिमी, भक्तपुर