नेपाली हास्यव्यङ्ग्य अनलाइन पत्रिका

जहाजमा मेडिकल सामग्री के आयो ?
तीन दिने टेन्डरमा कल्लेकल्ले खायो ?
गिद्धहरू गिदी खान्छन् सिनु भएपछि
कागहरू ज्यूँदैै खान्छन् दरबारमा पसी ।

स्याल दुम्सी तम्सिएर तमासा पो ल्याए
गिद्धजस्तै बनीकन कमिसन भ्याए ।
एकलौटी टेन्डरमा आफन्त नै पारे
सङ्कटको मौका छोपी के-के मारे ।

जता पनि गिद्धेदृष्टि हुन्छ खानामाथि
नेताजीको दृष्टि त्यस्तै बनेको छ साथी ।
जतनाले एक छाक खान पाऊँ भन्दा
मौका छोपी लुँड्याउने चलेको छ धन्दा ।

दाताहरू खाता खोली तयार छन् दिन
ठेकेदार ठगहरू जुटेका छन् किन ?
जनवादी, राष्ट्रवादी नेता कता गए ?
हुँदा खाने जनताको ढाड सेक्ने भए ।

गिद्धले झैँ खाएर डम्म
घ्याम्पे भुँडी देखियो अचम्म ।

नागार्जुन न.पा.-१, रानीवन, काठमाडौँ
९८४१४९१०८१