नेपाली हास्यव्यङ्ग्य अनलाइन पत्रिका

हिजो भन्थे- नेताजीले देशै खाने भए
आज भन्छन्- नेताजीले देशै लाने भए ।
कोही भन्छन्- देशलाई यहाँसम्म ल्याए
म त भन्छु- कुम्ल्याएर मुलुक नै भ्याए ।

भाइलाई फुटाउने सिरानीमा बसे
एकतामा जुटाउने जङ्गलमा पसे ।
सत्ताधारी टाउकेले खानसम्म खाए
राष्ट्रवादी जनताले पाउनु गोता पाए ।

कोही ठूला माछालाई जोगाउन थाले
कोही चाहिँ भाले-पोथी जुधाउन थाले ।
ठेल्ने, खेल्ने, खेलाउने परदेशी रहे
स्वदेशका प्रतिनिधि खेताला झैँ भए ।

अन्नबाली लगाउने, गोड्ने छैनन् कोही
मालिकको गोडा मोल्न छोड्ने हैनन् कोही ।
संविधान मिची उर्दी दिने भए मन्त्री
रिमुटले चल्ने भए खाँटी गणतन्त्री ।

यही वर्ष, केही हर्ष हुन्छ भन्ने आशा
बोकी जन तम्सेका छन् फाल्न वनमासा ।
मनोमानी धनमासा मासिएको छिन
पर्खिएर बसेका छन् भोलिका ती दिन ।

नागार्जुन न.पा.-१, रानीवन, काठमाडौँ
९८४१४९१०८१