नेपाली हास्यव्यङ्ग्य अनलाइन पत्रिका

१ आइतबार
हड्डीमा लडेका खिच्चाहरू फुकेर थामिसक्नु भएन
जताततै रेविजको र्याल थुकेर थामिसक्नु भएन ।
कसरी तह लाउने होला खिच्चालाई
देशैभरि रातदिन भुकेर थामिसक्नु भएन ।।

२ सोमबार
हड्डीमा खिच्चा तानातान गरिरहेका छन्
नजानेर पनि हैन जानजान गरिरहेका छन्
अपराधी खिच्चाको केही भर नहुने रहेछ
आफ्नै आमाका करङ खुस्काएर हानाहान गरिरहेका छन् ।।

३ मङ्लबार
हे भगवान रख्खे गर खिच्चाको भूत जाग्ने भो
सबै जनताको भोक निद्रा भाग्ने भो
अब मुङ्सिरको बेला कसरी थाम्ने होला खिच्चालाई
खिच्चाहरूका जन्तीको लर्को लाग्ने भो ।

४ बुधबार
अस्तिसम्म केही ढुकिरहेका त केही उँगिरहेका थिए
डाँगाका मुखको हड्डी खस्ला र खाउँला भन्दै रुँगिरहेका थिए
बेला बेला स्वानधर्मानुसार ङार्रर ङुर्रर गरेरै भए पनि
डाँगाकै वरिपरि बसेर हड्डीको गन्ध सुँगिरहेका थिए ।

५ बिहिबार
नठान्नू कसैले डाँगाहरू कजोर र ठिनेमिने छैनन्
गल्लीबाट भुकेर हैरान गर्दा पनि खुलस्त देखिने छैनन्
खोरमा सुतेका डाँगा मङ्सिरतिर मालिकले फुकाउने हल्ला छ
फुकेर आएपछि भुकेर बसिखान दिने छैनन् ।।

६ शुकबार
उहिले उहिले त खिच्चाहरू फ्याँकिन्थे मारेर
आफ्नै दाँत झार्न खोज्थे हड्डी दाह्रेर
अब कहाँ त्यस्तो छ र
अहिले त खिच्चाहरू हड्डी टोकिरहेका छन् गोडा पसारेर ।।

७ शनिवार छुट्टी
आज खिच्चाको साप्ताहिक छुट्टी छ
अट्टालिकामा बाँधिएको खिच्चाको फाइँफुट्टी छ
सबै खिच्चाले हड्डी बराबर लुछ्न नपाउने नियमले गर्दा
कुनै खिच्चो बङ्गुर भो त कुनै खिच्चोको भाँचिएला जस्तो खुट्टी छ ।।
।।सकिए।।

भद्रपुर, झापा