नेपाली हास्यव्यङ्ग्य अनलाइन पत्रिका

राजधानीको अत्तरले सुगन्धित पार्दैछ
मानिसका छाला, मुटु र फोक्सो सपार्दैछ
राजधानीले उत्पादन नगरे क्षिमेकीले
कहाँ पाउँछ र निशुल्क सुगन्धित अत्तर !

नाकले त मास्कको धोती लगाएर थोरै छान्छ होला
आँखाहरूलाई के फरक पर्यो र ?
धुलाका कणले अलिकति दुखाको त हो
दुई देखी सोह्र पाङ्ग्रेले ठुस्स फालेको ग्यासले
एकछिन् अँध्यारो मात्र पारेको हो
फोरिहालेको त होइन नि आँखा
अलिकति पिरो थपेको त हो
अन्धै बनाएको त होइन नि आँखा ।

फोक्सोका दुलाहरू बिस्तारै टाल्दै होला
पुरै स्वास फेर्न बन्द भाको कहाँ हो र ?
अलि अलि असहज भएको त हो नि !
बिस्तारै रूपलेला आफ्नो, मारी हालेका छैन नि !

छालामा फोका, दाद आएर कन्याउनु परेको त हो नि !
कालो फोस्रो हुँदैमा के बिग्रियो ?
चिल्लो किन चाहियो ?
चाहिहाले क्रिम पाउडर दलौँला
विदेशबाट आयातित सौन्दर्य सामग्रीको खपत गर्नु परेन ?

धुलो, मुख र नाकबाट तानिए पनि
हिलोले लुगा र जुतामात्र छ्यापेको हो
हिलो जिऊ भित्रै त छिरेको होइन नि ?
मेलम्ची सम्झेर ट्याङ्करको पानीले पखाल्दा भैगो
कठालो र भित्री बाउलामा हातले जोर लगाउँदा
शारीरिक अभ्यास हुन्छ के बिग्रियो र ?
अलिकति बढि श्रम र पाउडर थपिने त हो

बसबाट ओर्लिदा खाल्डोमा खुट्टा मर्याक्क मर्केको त हो
लेगामेण्ट गएको होला भाच्चिएको त छैन नि
भाँचिएन भने कसरी चल्लान ती ठुला अस्पताल
डाक्टरलाई तलब
औषधिको मूल्य
मेसिनको भाडा चाहिएन ?
थोरै बिचौलियाको ज्याला पनि

जनता त हो, ठुलो कुरा गर्ने ?
ठुलो हाकिम अनि नेता हो र ?
ठेकेदार हो र ?
बिचौलीया हो र ?
धुवाँ नै खान नहुने ?
खाल्डोमा खुट्टै पर्न नहुने ?
हिलोले छ्याप्नै नहुने ?

मर्सिडिज, प्राडो, स्कर्पियो
अनि अरू महंगो केके केके
सबै गाडिको नाम था पाउनु पर्छ ?
खाल्डो, हिलो, धुवाँसँग संगत नगर्न
कालो सिसा भएको गाडी चाहिन्छ
त्यो सामान्य नेपालीले पाउन सम्भव छ ?
छैन भने,
नेता, हाकिम, ठेकेदार, बिचौलिया हुँकिएको हेर्ने
अत्तर सुँघ्ने, हिलोले पोतिने, खाल्डोमा लच्किने
लुख्रुक्क लुख्रुक आफ्नो बाटो लाग्ने
धेरै बाँचेर सुबिधा उपभोग गर्नु किन पर्यो ?
जनता त हो ।

ब्रह्माण्डमा अन्तरघुलित राजधानीको अत्तर
ससाना छिनारबाट
प्राडो, पजेरो र मर्सिडिज
महल, कोलोनी र भिल्लामा
अनि सिंहदरवारतिर छिर्छ होला ?
सत्ता र शक्तिको जोसमा
दुनिया हराएको मदहोसमा
के अत्तरको सुगन्धको अनुभूति त्यतातिर पनि हुन्छ होला ?

०००
कैलाली, हाल काठमाडौं