नेपाली हास्यव्यङ्ग्य अनलाइन पत्रिका

जाँड रक्सी खानेलाई छानीछानी तान्थे
भाटा भाँची थुतुनामा पाताकसी हान्थे-
गाउँघर वरपर थर्काएर राख्थे
आफू भने गौमाताको मासुसित चाख्थे ।

जब उनै सिंहजस्ता पदधारी भए
कोसेलीमा काजु बोकी रतेलीमा गए-
“दशैँ मानौँ” भन्दै त्यहाँ बन्न थाले बोके
दुवै जना मिली रक्सी ‘हिमालयन’ धोके ।

धोकेपछि मात्तिएर केके गरे अरे
दोषी चस्मा फुटालेर गर्नुसम्म गरे ।
भन्न थालिन् पीडितले धक फुकाएर
भोलिपल्ट मैञालाई राखे लुकाएर ।

त्यसपछि आत्तिएर बोली फेर्न थालिन्
पर्सिपल्ट प्रहरीमा जाहेरी पो हालिन् ।
विमुख भै पीडकले राजीनामा ठोके
बोतलको बाँकी रक्सी पुलिसले बोके ।

आज उनी चौघेरामा बसेका छन् एक्लै
रतेलीमा रक्सी खाँदा स्वाद पाए बेग्लै ।
रक्सीले नै उचालेर पुर्‍याएछ उता
खाँटी दोषी रक्सी बनी सुर्‍याएछ यता ।

‘रक्सी नखा’ भन्नेले खायो
खाँदाखाँदै जिन्दगी डुबायो ।।

०००

नागार्जुन न.पा. १, रानीवन, काठमाडौं
९८४१४९१०८१