नेपाली हास्यव्यङ्ग्य अनलाइन पत्रिका

अस्पताल बनेन भनी किन कराको
सिटामोल पाएन भनी किन कराको
स्कुल खुलेकै रैछ
पुस्तक भेटेकै रैछ
बाटो पुगेकै रैछ
चुलोमा आगो फुकेकै रैछ
बेकार
यो भएन
त्यो भएन
भन्दै हल्ला गरेर हुन्छ
घोषणा पत्र पढ्न
तिमीहरूलाई के, चाहिएको हो
सबै छ ।

नेपालमै रेल आएछ
सस्तोमा तेल पाएछ
सलल पानी जहाज बग्दो रहेछ
छिन-छिनमै
मेचीबाट महाकाली पुग्दो रहेछ
किसानले मल पाए
खेलाडीले बल पाए
पाउन पर्नेले सबै पाइसके
तिमी किन हल्ला गरेको
पत्यार नलागे
घोषणा पत्र पढ
अगाडि बढ ।

एका-एक
इनकम दोब्बर भए
कालीगण्डकीको कला-पत्थर
बेच्न देश-विदेश गए
सुन छोडी
लसुनको खेती गरे
हुने जति सबै भैसके
कुरै नबुझी किन कराको
घोषणा पत्र पढ
तिमीलाइ के चाहिएको हो ?
सबै छ
सबै भै सकेको छ ।

०००
धादिङ