नेपाली हास्यव्यङ्ग्य अनलाइन पत्रिका

मैंले मागे बमोजिमको मोल
जसले नगरेर तोलमोल गर्छ कबोल
पुग्छु उनकै टोलमा चाख्न झोल ।

मानिस भएर के भयो ? भएकोले भेडावादी,
म देखेको लेख्दिन्, लेखेको पढ्दिन्
सत्यको पक्षमा रहन्छु अबोल ।

कुर्सीको परिक्रमा गरिरहन्छु गोल-गोल
जसले जति सम्झाए पनि
अब म सुध्रिनेवाला छुइन
जहिले पनि छु तत्पर
जहाँ जहिले पनि गर्न गञ्जागोल ।

जसले झुण्ड्याइदिन्छ मेरो घाँटीमा
तिरेर मेरो बाजार अनुसारको मोल
बजाउन थाल्छु उनकै वाहवाहीमा ढोल ।
हुन्छु तैयार कहिले यसको
कहिले उसको खुट्टाको बन्न फुटबल ।

यो मेरो भिजिटिंग कार्ड
भविष्यका लागि सम्हालेर राख्नुस्
एकचोटी सेवाको अवसर दिएर त हेर्नुस्
तपाईंको एक निर्देशनमा
अभद्रताका टोडेर सारा सीमा
मच्चाउन सक्छु सबैतिर भद्रगोल !!

हो हजुर ! भेडामा पनि म छु
हाइब्रिड नश्लको भेडा बुझिराख्नुस् ।

०००
विराटनगर