नेपाली हास्यव्यङ्ग्य अनलाइन पत्रिका

यो सरकार तिमीहरूको हो
तिम्राहरूको हो
यो सरकार प्रेमको होइन
हाम्रो होइन
जनताको होइन ।

खेतिपाती गर्ने किसानको हुँदै होइन
कुटो कोदालो चलाउने
गाई भैंसी भेडा बाख्रा पाल्ने
परदेशमा कमाएर परिवारको गर्जो टार्ने
सरकारका लागि बिप्रेषण आयात गर्ने
को त हुँदै होइन
गरिखानेहरूको हुँदै होइन।

यो तिम्रो हो
तिमीलाई पोस्ने को हो
भोका पेटमा आगो झोस्ने को हो
बिचौलियाको हो
नक्कली किसानको हो
नक्कली गोठालाको हो
नक्कली हलीको हो
तिमीले दिने अनुदानवालाहरूको हो
ठगिखानेहरूको हो ।

ल, चलाऊ तिमी
तिमी नै जनता
तिमी नै नेता
तिम्रो नै भूगोल
तिमी नै क्षेत्रफल
तल्सिङ तिमी
मोही तिमी ।

इमान र जमानमा बाँच्नेहरू
पाखुरा लिएर बसाई सर्दैछन्
तिम्राहरू धनको पोको बोकेर
उतै सुइकुच्चा ठोक्दैछन्
तिम्रा मान्दै गरेका तिम्रा होइनन्
नितान्त धनका हुन् धनका !

शासन चलाऊ तिमी मिलिजुली
बस अब घरकुटी खेली
मान्छे विहिन मझेरीमा
राष्ट्रको अस्थिपन्जर रहेसम्म
चलाऊ तिम्रो सरकार तिमी नै ।

०००
कैलाली, हाल काठमाडौं