नेपाली हास्यव्यङ्ग्य अनलाइन पत्रिका

जब विकासमा तगारो हुन्छ
बाँच्न निकै गाह्रो हुन्छ
तब पुर्‍याउन आफ्ना जीवनका अनिवार्यता
अपरिचित देशमा खोज्न
रोजगारीका अवसरहरू
उतै जाने हतारो हुन्छ ।

ल भन्नुस् हजुर !!
विदेशिनु कसलाई प्यारो हुन्छ ?

जब अभावको काँडाले घोचेर
स्वाभिमानलाई बन्दकी राख्दा
मानिसको मुहार निन्याउरो हुन्छ
आफ्ना अनिवार्य आवश्यकता टार्न
टाउकोमा अनपेक्षित उधारो हुन्छ
साहुका शब्द बाण असह्य भएर
जिन्दगी धरामा भारो हुन्छ
तब अपरिचित देशमा खोज्न
रोजगारीका अवसरहरू
उतै जाने हतारो हुन्छ ।

ल भन्नुस हजुर !!
विदेशिनु कसलाई प्यारो हुन्छ ?

बेरोजगारीको पीडा अजिंगर भएर
चारैतिर अन्यौलको अँध्यारो हुन्छ
आपसी छिनाझप्टीमा फँसेर राजनीति
जनताको चाहना उसको चारो हुन्छ
जसलाई जिम्मा लाएका थियौं
आफ्नो भविष्य जलप लगाउन
उही जब हाम्रा सपनाको हत्यारो हुन्छ
जब चारैतिर फैलिएको द्वेषको दुर्गन्ध
सहन निकै साह्रो हुन्छ
तब अपरिचित देशमा खोज्न
रोजगारीका अवसरहरू
उतै जाने हतारो हुन्छ ।

ल भन्नुस हजुर !!
विदेशिनु कसलाई प्यारो हुन्छ ?

०००
विराटनगर