नेपाली हास्यव्यङ्ग्य अनलाइन पत्रिका

बाह्रभाइ बा चार अङ्गमा
एउटै गला बाह्र रङ्गमा
यो नयाँ कथा बाह्र भाइ बा
भेटियो भनी हल्लखल्ल छ ।१ ।

सत्य हो भनी ढाँट्न पाउने
जेसुकै कुरा काट्न पाउने
बाह्रभाइको गोप्य मित्रता
क्या अचम्मको पत्रकारिता ।२।

दाम आउने काम जान्नुभो
मित्र फाल्नुभो चोर छान्नुभो
दामवालको नाम खोज्नुभो
खास्सखुस्सको मार्ग रोज्नुभो ।३।

छाम्न जान्नुभो डाम्न जान्नुभो
जोखनासँगै काम्न जान्नुभो
यातना दिँदै काम सार्नुभो
मख्ख पार्नुभो तेल झार्नुभो ।४।

तेल आउँदा सञ्च मान्नुभो
पत्रकारिता गर्न जान्नुभो
लेख लेख्नुभो ठाउँ ठाउँको
गीत गाउँदै आफ्नु माउको ।५।

फाइदा हुने चाल चल्नुभो
नत्र ठाउँको ठाउँ दल्नुभो
कान्तिका कुरा गर्न थाल्नुभो
शान्ति कुल्चिदै हर्न थाल्नुभो ।६।

क्या नयाँनयाँ कर्म देखियो
गर्नु यो कुरा धर्म देखियो
फाल्न जान्नुभो टाल्न जान्नुभो
के कुरा गरौं बाह्र भाइको ।७।

०००
ओखलढुङ्गा