नेपाली हास्यव्यङ्ग्य अनलाइन पत्रिका

यहाँ के पाइँदैन सबथोक पाइन्छ
गुट्खा पान पराग के के चाहिन्छ
चाउचाउ चाउमिन सबथोक खाइन्छ
कुरकुरे लेस झुरूम झुरूम चपाइन्छ
उत्पादित चिसोले आँत भिजाइन्छ
थरिथरी मादक रसले मुटु सिचाइन्छ
छिन भरमै त्यो सगरमाथा चिनाइन्छ
माग्ने लतले काम गर्ने मन छिनाइन्छ
अन्न पानी लुगा लत्ता उतैका लगाइन्छ
तिहुन तरकारी परदेशबाटै मगाइन्छ

फसल कर्मी मजैले घोक्र्याइन्छ
बस्तुभाउ पालकलाई झोक्र्याइन्छ
किसानको सास नली पक्र्याइन्छ
मोलतोलमा बिचौलिया टक्र्याइन्छ
फ्याट्ट नक्कली किसान जन्माइन्छ
युवनयुवतीहरू विदेशतिर अन्माइन्छ
कागज पत्रमै खेतीपाती गराइन्छ
टिप्पणी मिलान अनुदान भराइन्छ
खादामाला परदेशबाटै भित्र्याइन्छ
आयातमै थैली निचोरेर नित्र्याइन्छ
आफ्नो शासन धम्क्याएरै चलाइन्छ
गणतन्त्ररूपी ध्वजा पर्गला चढाइन्छ
माथि तल सर्वत्र माग्ने बनाइन्छ
माग्दा माग्दै देशकै देह गह्नाइन्छ

गाउँ गाउँमा एनजियो खटाइन्छ
तोक आदेश माथिबाटै पठाइन्छ
आइएनजियो ल्याइन्छ भित्र्याइन्छ
विज्ञहरूको बुद्धि दस्तुर बुझाइन्छ
जताततै नाम जनताकै भजाइन्छ
जनताजनता जन जिनिस पचाइन्छ
जन विरोधी छ कोही करङ् बजाइन्छ
मार्क्सवादी बासुलाले छाला तछाइन्छ
समाजवादी बन्चरोले फ्याक गराइन्छ

समावेशी छिनोले स्वाद पिलाइन्छ
लोकतान्त्रिक घनले आकार मिलाइन्छ
पत्रपत्रिका रेडियो टिभिमा बकाइन्छ
जो मान्दैन मुद्दा लगाएर फसाइन्छ
गणतन्त्रको गीत मजाले गवाइन्छ
समाजवादको मूल धक्कू लगाइन्छ
जनवादको भट्टीमा पुँजीवाद फलाइन्छ
राजतन्त्रको स्थायी भूतले तर्साइन्छ
बोल बोल गणतन्त्र बोल नत्र बर्साइन्छ !

०००
२०७९/११/२२
तेल्या लेक, डोटीबाट झुलाघाट बैतडीसम्मको यात्रामा