नेपाली हास्यव्यङ्ग्य अनलाइन पत्रिका

सोचेको कुरा पुग्दो रहेनछ,
पत्थरमा खप्पर ठोकेर,
भाग्योदय हुँदो रहेनछ ।
सम्मान पनि पुर्पुरोमा लेखे पो हुन्छ !
सासू-ससुराको सम्पत्तिबाट
उभ्याइएको सासू-ससुरा स्मृति प्रतिष्ठानबाट
जीयाकुमारीले पाइन्
झुण्डिएर मरेकी नन्दको नाउँबाट स्थापित
‘वीराङ्गना महिला सम्मान’
चोरीको अभियोगमा जेलमै मरेको
सालोको स्मृतिमा
अचेतबहादुरले पाउनु भयो
‘आदर्श नागरिक सम्मान’ ।
जताततै बेमौसमी सम्मानको घमासान !
यस्तै यस्तै सबै साथी भाइले गरेर तानातान
हात पारिसके अनेकौं अभिनन्दन पत्र
मायाको चिनो
अरूहरूले यसरी जिलेबी खाएको देखेर
घुटुक्क घुटुक्क थुक निलेर,
टुलुटुलु हेर्दै थपडी मात्र बजाएर,
बस्न अब अति नै गाह्रो भएको छ,
जसरी पनि अब मलाई पनि
गलामा सयपत्रीको माला
काँधमा दोसल्ला झुण्ड्याउनु छ
कति पर्खेर बस्ने लिएर मनमा
उम्रिएको सपना- फाटेको कामना
कति मीठो हुँदो रहेछ यो सम्मानको चाहना
’ल भन्नुस् रामेश्वरजी !
मेरो सम्मान कहिले हुन्छ ?

०००
विराटनगर