नेपाली हास्यव्यङ्ग्य अनलाइन पत्रिका

उनीहरूले कहिलै गल्ती गर्दैनन्
कुनै नियम र कानुनले उनीहरूको बाटो छेक्दैन
नियम र कानुनका उल्झनहरूलाई
उनीहरु जुत्ता मुनि कुल्चिएर हिंडछन्
ती जुत्तामा दाग देखिए पैसाको बिटाले पुछिदिन्छन् ।

विदेशी शासकले विदेश भ्रमणमा जाँदा उपहार स्वरुप दिएको
कोटको गोजीमा उनीहरू देशको संविधान बोकेर हिँड्छन्
त्यसैले उनीहरूले कहिलै संविधान मिच्दैनन् ।

उनीहरू सधैँ केन्द्रमा हुन्छन् किन कि
उनीहरू व्यवस्था सञ्चालन गर्ने
गाडीका अघोसित तर वास्तविक चालक हुन्
सबै त्यस्ता गाडीहरू केन्द्रबाट नै सञ्चालित हुन्छन् ।

उनीहरू सरकारी  विकासे ठेक्काका
निर्विकल्प  ठेकेदार हुन्
वा पेशावर किङ्ग मेकर हुन्
उनीहरू स्वतन्त्र छन्
कालो बजारलाई सेतो बनाउन
मानिसहरूलाई सिन्डिकेटको फन्दामा फसाउन
सम्पत्तिको शिकार गर्न अस्पताल र स्कुलको पासो थाप्न
किनकी उनीहरू पार्टीका प्रायोजक हुन्
उनीहरू सत्ता नृत्यका निर्देशक हुन् ।

उनीहरू दरबारमा बस्छन्
त्यो महल अगाडि बाटोमा फोहर पानीको पोखरी छ
बिहान बेलुकी त्यो बाटोमा उनीहरूको सवारी चल्दा
गाडीका चक्का पानीमा छप्ल्याङ डुब्दा
फोहोर पानीले गाडी डुबाउँदा
न त्यो हिलोले उनीहरूलाई छुन्छ
न त्यो हिलो गाडी नै उनीहरूले सफा गर्नुपर्छ
हिले बाटो नबनाउँदा उनीहरूलाई कहिलै दाग लाग्दैन
त्यसैले उनीहरू सधैँ सफा र दागरहित देखिन्छन् ।

उनीहरूका पहिरन दाग अबरोधक हुन्छन् ।
किन कि उनीहरू कानुन माथिका मान्छे हुन् ।

०००
अल्बानी, क्यालिफोर्निया