नेपाली हास्यव्यङ्ग्य अनलाइन पत्रिका

आयो सर्प मिथिलामा मुक्तिनाथ ढोगी
भोज भयो भारतमा भन्छन् भुक्तभोगी ।
नाकाबन्दी गराएको बिर्सिएको छैन
जङ्गेपिलर हराएको भेटिएको छैन ।

नेपालमा जन्मिएका बुद्ध नै हुन् शुद्ध
फेरि भन्छ भारतमा जन्मेका हुन् बुद्ध ।
दुई जिब्रे सर्पलाई मान्ने कस्ता नेता ?
धोका पाए पनि फेरि गुथाउने फेटा ।

धोती-कट्टु उचालेर डस्नेलाई ताज ?
जनताले अभिनन्दन् गर्ने किन आज ?
सकस र दकसमा जनता छन् दिक्क
नेपालको सरकार छ उतैतिर ठिक्क ।

दिन्छु भन्छ दिनलाई हात कमाउँछ
आयोजना ओगटेर राख्न रमाउँछ ।
ड्रयागनले गर्ला केही भन्ने मानी डर
गर्छु भन्छ तर छैन भारतको भर ।

गाँठी कुरा जानाजानी नेता हाम्रा बिके
ढिला-सुस्ती गर्न पनि उतैबाट सिके ।
गुरुजस्तै चेला बने, नेपालका नेता
कालो धन्दा गर्नेहरू बनेका छन् सेता ।

नेताले नै बिच्छीलाई पूजा-पाठ गरे
स्वाभिमानी नेपालीका शिर तल झरे ।
सत्कारमा भित्रभित्रै चलखेल भयो
सरकारको सत्कारमा रमाएर गयो ।

आयो सर्प सेनाको साथमा
सुरक्षाको सगरमाथामा ।

०००

नागार्जुन-१, रानीवन, काठमाडौं
९८४१४९१०८१