नेपाली हास्यव्यङ्ग्य अनलाइन पत्रिका

(सिस्नुपानी मकवानपुरले ०८० वैशाख २२ गते आयोजना गरेको हास्यव्यङ्ग्य  कविता प्रतियोगितामा उत्कृष्ट २५ मा छनाेट भएकाे कविता  हाे याे ।  वाचनमा मिश्रित अनुपस्थित रहनु भयाे । छनोटमा परेका २५ वटै र सहभागी अन्य हास्यव्यङ्ग्य कविताहरू फित्कौलीले क्रमशः पोष्ट गर्ने छ । कृपया आआफ्नो तस्वीर info@fitkauli.com  मा यथाशीघ्र पठाउनु होला । -प्रधान सम्पादक)

लगायो लुगा देशले जीर्ण भाङ्ग्रो
गनायो सुतेको छ ओछ्यान थाङ्ग्राे
नदीमाझ सम्पूर्ण भुल्ला बगाओँ !
सफा होस् बरु देश नाङ्गो बनाऔँ ।

लिपू लेक सुस्ता कतै क्यै नटालाैँ
बरु छेउछाउ कतै बेच्न थालौँ
नछोडौँ न सत्ता र भत्ता पचाऔँ !
मरोस् देश खुत्रुक्क जत्था बचाऔँ ।

लडौँ आफुआफू विदेशी गुहारौँ !
उ हारोस् कहिल्यै म हार्दै नहारौँ ।
नखोलेर उद्योग नै ठप्प पारौँ
रुपैया सबै बैङ्कमा लै थुपारौँ ।

गिटी बालुवा झैँ युवाशक्ति बेचौँ !
यहाँ अन्न फल्दैन बेच्दै नबेचौँ ।
बचेका बुढा, बालबच्चा र नारी
सकिँदैन रे पाल्न पारि नतारी ॥

मिठा भाषनैले निराशा भगाऔँ
भिसा पाउनानिम्ति आशा जगाऔँ ।
घडेरी नजोडे कहाँ बस्नु साथी !
छ मेरो नि मान्छे बुझेनस् र माथि ?

मजाले लुटौँ भोटको मोल तोकौँ
कहाँ मिल्छ मौका बसी रक्सी धोकौ !
जुको झैँ गडौँ देश नै होस् न डाम्रो
गएको छ कस्को र के जान्छ हाम्रो ?

उडाएन पाजी छुसे लाउडाले
चुहाईरहोस् र्याल थोत्रे बुढाले
अझै डङ्डमी डुङ्डुङी नै गनाऔँ
यही चालले देश नाङ्गो बनाऔँ ।

अरूको भने आङको भैँसी देखौँ
भए आङमा आफ्नु जुम्रो नदेखौँ
कसैले नटेरे दिए हुन्छ धक्का !
न मेरो छ गोरू न बाह्रै छ टक्का !!

लगौँटी फुकालौँ नमानेर लाज
यसोरी लजाए कहाँ चल्छ काज ?
सबै नाङ्गिऔँ नाङ्गिनै हुन्छ राम्रो
अझै बाङ्गिऔँ बाङ्गिँदा हुन्छ राम्रो ।

बरू श्रीमती, सम्पति, सान छोडौँ
गए जान्छ यो प्राण वा ज्यान छोडौँ !
नछोडौँ नछोडौँ नछोडौँ नछोडौँ !
इमान्दारितासाथ कुर्सी नछोडौँ ।

पुगोस् नर्कमा  देश बाटो नरोकौँ
यहाँ शान्तिको बोट रोप्दै नरोपौँ
सदाचार तोडौँ दुराचार बोकौँ
खरो राष्ट्रवादी बनी गान घोकौँ ।

०००

२०८० वैशाख १४ गते
कालीगण्डकी ५, फोक्सिङ, गुल्मी