नेपाली हास्यव्यङ्ग्य अनलाइन पत्रिका

डा. बमबहादुर जिताली :

तस्करका लस्कर महान ।
खाए देश मिलेर जहान ॥

देखेँ कतै नदेखेको महाजात्रा मैले
गाई-जात्राभन्दा ठूलो जात्रा चल्यो ऐले ।
जल्ले जेजे गरेपनि कल्ले ठोक्न सक्ने ?
रतेलीको स्वतन्त्रता कल्ले रोक्न सक्ने ?

रतेलीमा ठेउवा, कौवा गीत गाउन थाले
पखेटा नै उचालेर नचाउन थाले ।
बाज आयो हानिएर आँखा नचाउँदै
स्याल, कुकुर, गिद्ध आए झनै हँसाउँदै ।

बाँदरको हातपर्‍यो डल्लै नरिवल
बिरालो र बाघहरू गरे खलबल ।
टाठा-बाठा बलियाले मोज गरी खाए
लाटा-सुधा जनताले खानु दुक्ख खाए ।

जोजो आए खाए गए काम कल्ले गर्‍यो ?
जल्ले पनि मौका पारी आफ्नै भुँडी भर्‍यो ।
जल्ले पायो डाडु-पन्यू उल्ले खायो धेरै
सीधा-सादा नारी चाहिँ सधैं हेर्‍याहेरै ।

राति चल्ने रतेली त दिन घोडे-जात्रा
कतिञ्जेल चल्ने होला यस्तो गाई-जात्रा ?
रतेली र गाई-जात्रा मिलाएर मात्रा
रतेलीको रौनकमा भयो महाजात्रा ।

तस्करका लस्कर महान ।
खाए देश मिलेर जहान ॥

०००

नागार्जुन-१, रानीवन, काठमाडौं
९८४१४९१०८१